Ustaz degen uǵymnyń qasıetin qansha sózben árleseń de jetkize almasyń anyq. Tek bul esimdi aldaǵy jetistikterińmen ǵana ulyqtaı alasyń degenge kelisemin. Qazir kishkentaı ǵana qıyrda meken tepken Kúnshalǵan aýylyna qarasty mektepte qazaq tili men ádebıet páni muǵalimi Sádýaqasova Gúlbarshyn Anasqyzy týraly qalam tartpaqpyn. Árıne kez kelgen aýyldy mekendegi oqýshylar, tabıǵaty áser etkennen be, áıteýir, ádebıet, qazaq tili sekildi gýmanıtarlyq pánderge ıkemdi keledi ǵoı. Tek durys jol kórsetseń bolǵany, al osy baǵytta jóndi baǵdar beretin ol ustaz. Pedagog degenimiz jańa urpaqqa ǵasyrlar boıy jınaqtalǵan barlyq baǵaly dúnıelerdi berip, jalǵan senimderdi, kinárattar men keselderdi bermeýge tıisti adam. Dál qazirgi sát sanamnan sarqyp shyqqan oılar, bir arnaǵa toǵysar emes, óıtkeni aıtqym keletin jaıt óte kóp. Meniń qazirgi shabýyma sebepshi bolǵan da osy tulǵa bolǵandyqtan, aıtarymdy qaǵazǵa syıdyra almaımyn ba dep zárazap bolyp otyrǵan keıpim osy.
Topyrlap qalmaqtardaı aıǵaı shýmen júretin bizdiń synyp bul apaıdyń sabaǵyna kirgende moldaǵa uıyǵan jamaǵattaı únsiz qalatynbyz. Ol ustazdyń oratorlyq qabiletiniń joǵarǵy shegi dep paıymdadym. Sol kisi arqyly qazaqtyń aqyn jazýshylaryn tanydyq. Bul – asa mańyzdysy. Apaı eshqashan aqyn jazýshylardy bólip jarmaıtyn, olarǵa degen qurmeti erekshe bolatyn. Óziniń mamandyǵyn erekshe qurmetteıtin, bul ózin de erekshe qurmetteıdi degen sóz.
Qazir eki sózdiń basyn qurap maqala shımaqtap otyrǵanymnyń ózi sol adamnyń arqasy. Ulaǵatty ustaz ómirge basqasha kózqaraspen qaraýdy úıretti. Mektep oqýshysy retinde emes, ár balaǵa tulǵa retinde qarap, adam bolsyn degen tilegi boldy. Bul naǵyz pedagogtyń ustanymy dep topshyladym. Báıgege jaratqan jylqydaı bizge bar bilgenin úıretip túrli kil júırikterdiń dodalaryna qosatyn. Al báıge attarynyń arasyna túsken boldyrma attyń ózi namysqa tyrysyp shaýyp ketetini belgili ǵoı. Gúlbarshyn Anasqyzy dál ózim jetistikke jeter jolda eshqashan berilmeýdi úıretti. Talaı jarystarda omaqasyp túsken kezderim, júldeli bolǵan kúnderim de boldy. Sol sátte qoldaý bildirip kishkentaı oqýshynyń betin qaqpaı, belin býyp jiger bergen bul ustazǵa degen shákirttik alǵysym sheksiz.
Aıta berseń kóp endi. Bir tilim ushynda turǵan jaıt. Jerden taıaq jep júrgen kishkentaı balaǵa qazaqtyń dana tulǵasy Abaıdyń qanshama óleńderin jattatqany ne degen erlik dersiń. Jyl saıyn bar jattaǵan óleńderdi jınaqtap aýdan ortalyǵyna saýdaǵa shyqqan ana men baladaı baratynbyz. Sondaǵy taýarymyz ustazdyń úıretken bilimi men jeńiske degen senimi. Bala kezden úlken jarysta topqa túsken jetkinshek, ómirinde de sol qylyqty ádetke aınaldyrady eken. Daryndy dep daralap, belgili bir keskinnen shyǵaryp, ómirden óz jolymdy tabýǵa dáneker boldy. Mine, men úshin naǵyz muǵalimniń mindeti – osy.
Qazir Elbasy bastaýyn ashqan baǵdarlamalar óte kóp. Onyń ishinde muǵalimderdiń mártebesin kóterý týraly kóptegen bastama kóterilgeni belgili. Osy oraıda ustaz degen tulǵanyń ár tamshy mańdaı teri ulyqtalatyny, eshqashan umytylmaıtynynyń dáleli.
Al maǵan deıin, menen keıin de qanshama oqýshyǵa qazaq tili, ádebıet pánin úıretip, bilim nárimen sýsyndatqan Sádýaqasova Gúlbarshyn Anasqyzyna aıtarym: Búginde eki balanyń anasy, aıaýly áje atanǵan ustazymyzǵa aldaǵy ómirińizde shákirtterińizdiń baǵyndyrǵan belesterimen shattanyp, jumysyńyzda tolaǵaı tabysqa jetińiz. Densaýlyǵyńyz myqty bolyp, Qazaqstannyń úzdik ustazy bolyńyz. Siz buǵan ábden laıyqtysyz!
Ýathan Qabyltaıuly
