Este joq eski zamanda Saqtar qolǵa túsken tutqynnyń eki kózin oıyp, quldyqqa salady eken. Shamasy, kóshpendi órkenıettiń attyń jalynda, túıeniń qomynda álemdi baǵyndyrǵan kezi bolsa kerek. At tuıaǵy jetken jerdi óz menshigi sanaǵan bahadúrler taǵy birde alys aımaqqa soǵysýǵa attanady.

Qazirgideı ushaqpen ushyp baryp, bombalap qaıtyp keletin zaman emes, 20 jyldaı júrip qalypty. Elde qalǵan áıelderi jańaǵy soqyr quldarmen áýeıi bolyp, solarǵa kúıeýge tıip, bala tapsa kerek. Jıyrma jyldan soń qylshyldaǵan jas sarbaz qyrma saqal qyrqyljyńǵa aınalyp, elge qaıtady. Jańaǵy quldan týǵan býyn saqtardy óz Otanyna kirgizbeı, qyrǵyn shaıqas bolady. Saqtardyń da qatary seldireı túsedi. Sonda qolbasshynyń keńesshisi, kópti kórgen danagóı aqsaqal: "Bular keshegi bizdiń qulaq kesti quldarymyz emes pe? Quldyń qorqynyshy – qamshy. Qarý-jaraqty tastap, qolǵa qamshy alyńdar", - dep keńes beredi. Ásker arasynda sybyr-kúbir kóbeıedi. "Qylyshtan qaıtpaı soǵysyp jatqanda qamshysy nesi" degen sózder de estilip qalady. Aqsaqal bolsa "Qamshyny kórse qul ekenderi esterine túsedi. Másele júrekte emes, sanada" depti. Sodan, qolbasshy áskerge qoldaryńa qamshy alyńdar dep ámir beredi. O, ǵajap, jańa ǵana burynǵy qojaıyndarynan qaımyqpaı soǵysyp jatqandar qamshyny kórgende tym-tyraqaı bolyp qashypty.

Qazir bizdiń qoǵamǵa da bir QAMSHY ábden kerek-aq. Ata-baba dástúrinen bezip, basqynshy eldiń tilinde shúldirlegendi abyroı kóretinder bizde de jetip artylady. Ultty ult qylatyn negizgi dińgegi til men dil.

R.S. Keıde túsimde Kún Batysty betke alyp bara jatqan ǵundardyń qalyń qolyn kóremin. Aldynda aq boz atqa minip, qol bastap bara jatqan "Qudaıdyń qaharly qamshysy" Edil qaǵan. Artyna burylyp, qamshymen bir tartatyn sıaqty.

Ońǵar Qabdenov