Áleýmettik jeli «Shymkent oblysynda 80 jastaǵy kempirdi zorlap ketken» degen vıdeo tarap jatyr. Bul jergilikti arnanyń tilshisi daıyndaǵan sújet bolsa kerek. Ol jerde Marjan Abylaeva degen azamatsha sumdyq oqıǵany bylaısha áńgimelep beredi: «3 adam kýáger bolsa, shyndyq bolady deıdi. Ádildiktiń qaıda ekenin men bilmeımin. Osyndaı jaǵdaıǵa jetip otyr meniń sheshem. Esiktiń aldyna shyqqan sheshemdi qylqyndyryp ala jóneledi. Tún bolǵasyn bir ish kóılekpen jatqan. Sol kıimmen shyǵyp ketken. Aıaǵynda kebis bolǵan. «Qutqaryńdar» dep aıǵaılaǵan, biraq eshkim estimegen. Aryqqa aparǵanda sý bolmaǵan. Sosyn «seniń masqarańdy shyǵaramyn» dep egistikke alyp ketken. Egistikke súırep áketip, soraqy jaǵdaıǵa dýshar etedi» dep shyndyqty aıtady. Tilshiniń aıtýy boıynsha, keıýanaǵa qaıyn aǵasynyń balasy tap bergen. Aýyldaǵy egistikke shyǵaryp, oıyna kelgenin jasaǵan. Aýdandyq İİB-nan ádildik tappaǵan anasy men qyzy jergilikti «Nur Otan» partıasynan kómek suraýda.
Bul vıdeo eski me, jańa ma, ol jaǵy ázirge belgisiz. Másele onyń qashan shyqqandyǵy da emes. Qynjyltatyny – eki kúnniń birinde bala joǵalady, bala zorlanady. Júrekti aýyrtatyn, kóńil-hoshty túsiretin jaǵymsyz jańalyqtardan kóz asha almaı qaldyq. Gýgldyń izdeý júıesiniń kómegine súıensek, Aqtóbede, Pavlodarda, Taldyqorǵanda 80 jasqan kempirdi zorlady degen aqparat tolyp júr.
Psıholog Tóreǵalı Batyrhan Qamshy.kz aqparat agenttiginiń tilshisine bergen suhbatynda bylaı deıdi: «Aýrýyn jasyrǵan óledi» deıdi. Jýrnalıser, BAQ jaǵymsyz jańalyq bolsa da berýge mindetti. Sebebi aqparattyń bári adamnyń saqtanýy úshin jumys jasaıdy. Biraq jıirkenip, synaýdyń ornyna eliktep, kerisinshe qabyldaıtyndar da tabylady. Sońǵy kezde jaǵymsyz jańalyqtyń kóbeıýi «eshnárse kórmeımin dep kózin baılap, eshnárse estimeımin dep qulaǵyn bitep tastaǵan qazaqstandyq qoǵamdyń qanshalyqty dertti, qanshalyqty jabyq ekendigin kóremiz. Eshkim eshkimge kerek emes. Turaqty baspanasy, turaqty jumysy, turaqty aılyǵy joq adam ómirge beıjaı qaraı bastaıdy. Yza men renishtiń syrtqa shyqpaý saldarynan (bastyǵyna aıtýdan qorqady, dosyna aıtýdan uıalady degendeı) ishi negatıv taý-taý bolyp jınalady. Tóbeles bastalsa pyshaqty sýyryp alyp pyshaqtasýǵa daıyn turady. Kerek bolsa ólýge de daıar. Ony sebebi eshnárse ustap turǵan joq. "Al, maǵan ne isteısiń?" dep keýde keredi. Qoǵamnyń jabyq ómir súrýinen qylmys kóbeıýde. Eýropa munyń bárin bastan ótkizgen. Sondyqtan da olar qatelikti túzep, ashyq qoǵam saıasatyn tańdap otyr. Bizge de tańdaý jasaý qajet-aq».
