AQSH bıligi Qytaıda óndirilgen taýarǵa 50 mıllıard dollarlyq keden salyǵyn júzege asyrý jumysynyń 16 mıllıard dollarlyq ekinshi bólimin 23 tamyzda júzege asyrmaq. Batys basylymdarynyń habarlaýynsha, prezıdent Tramptyń «Tehnologıalardy urlaý men ádiletsiz saýda júrgizý» sebebimen Qytaıda shyǵarylǵan tehnologıalyq ónimderge baj salyǵyn salýynyń ekinshi kezeńi naqtylady.

Amerıka Qurama Shtattarynyń Saýda ókili (USTR) 23 tamyzdan bastap taýar qunyna 25 paıyz kólemde salynatyn keden salyǵy 16 mıllıard dollar bolatyn taýarlar tizimin jarıalady. Bul tizimde moto maıy,  etılen, vınılhlorıd, akrıl polımerleri jáne jartylaı ótkizgishterge qatysty 279 túrli taýar bar.

Qytaıdyń qorǵanys, avıasıa jáne óńdeýshi sektorlaryna baǵyttalǵan keden salyǵynyń 7 shildede qoldanysqa engen alǵashqy bóliminde bolsa ıadrolyq reaktorlar, gaz týrbınalary, aýa jáne gaz suıyltqyshtary, peshter jáne komersıalyq ydys-aıaq jýǵyshtar sıaqty 34 mıllıard dollar shamasyndaǵy 818 taýar bar bolatyn.

AQSH-tyń Qytaıdy 50 mıllıard dollar salyq tóleýge jyǵatyn jańa áreketi Tramptyń saılaýaldy baǵdarlamasynda aıtylǵan. Birtindep júzege asyra bastaǵan AQSH bıligi bul qadamyn eldegi taýar óndirýshilerdi demeýge de septigin tıgizedi dep sanaıdy. Al, Álemdegi arzan eńbek kúshi sanalatyn Qytaı buǵan jaýap retinde AQSH-ty DSU talaptaryn buzyp otyr, - dep aıyptady. «AQSH úkimetiniń bul sharasy QHR-dyń zańdy quqyqtary men múddelerine qol suǵý jáne Qytaıdyń damýyna qater tóndiredi», - degen bolatyn Qytaı bıligi. Qytaı da amerıkalyq avtomobıl men aýyl sharýashylyǵy ónimderiniń salyǵyn ishinara arttyrǵan.

Saýda soǵysy – saýda qatynasyndaǵy eki eldiń bir-birimen saýda sharttary arqyly kúresýi. Bul soǵystyń basty qarýy keden salyǵy men ımport-eksport kvotalary. Aıtalyq, bir el saýda tarıfterin kóteredi, ekinshisi osyǵan uqsas jaýap qaıtarady. Saýdadaǵy keden salyǵy arqyly jasalǵan soqqylary bir-biriniń ekonomıkasyna zıan keltirýi, tipti eki el arasyndaǵy saıası shıelenisti kúsheıtýi múmkin.