Jańa oqý jylynan bastap 5-7 synyptarda oqytylatyn oqý quraly jaryq kórdi. "Ólketaný" oqýlyǵyna Astana ákimi Áset Isekeshov, telejúrgizýshi Maııa Bekbaeva men Dınara Satjan týraly aqparat engizilgen, dep habarlaıdy Qamshy.kz aqparat agenttigi.
Oqýlyqqa ákim men shoý-bıznes ókilderi týraly aqparattyń engizilýine qatysty aqparat alý úshin Almaty kitap baspasy" JSHS-nyń bas redaktorynyń orynbasary Almıra Sýjıkovaǵa habarlastyq. Ol atalmysh aqparattyń qaı bólimde ornalastyrylǵanyn bilmeı jáne ne úshin telejúrgizýshi Maııa Bekbaeva týraly aqparat oqýlyqqa engizilgenin túsindire almaı, ýaqyt kerek ekenin aıtty. Almıra hanym oqýlyqtyń mazmunymen tanysýǵa birneshe saǵat nemese birneshe kún jumsasa da Qamshy.kz aqparat agenttigi onyń pikirin sol ýaqytta nazarlaryńyzǵa usynatyn bolady.
Sputniknews.kz-tiń málimetine sáıkes "Ólketaný" oqýlyǵyn bilim jáne ǵylym mınıstrliginiń tapsyrysy boıynsha "Almaty kitap baspasy" basyp shyǵardy. Eki tilde shyqqan oqýlyq 5-7 synyp oqýshylaryna arnalǵan. Jańa oqý quralyndaǵy materıaldar Qazaqstan tarıhy, qazaq ádebıeti, geografıa boıynsha negizgi mektep baǵdarlamasyn qaıtalamaı, tolyqtyrady, deıdi kitap avtorlary.
Oqý baǵdarlamasy Nursultan Nazarbaevtyń usynysymen «Týǵan jer» memlekettik baǵdarlamasynyń negizinde jazylǵan. Baǵdarlamanyń maqsaty — óskeleń urpaqtyń boıynda potrıottyq sezimdi qalyptastyryp, Otanǵa degen súıispenshilikti oıatý.
"Bizdiń baspanyń Qazaqstannyń salt-dástúri, mádenıeti, tarıhy boıynsha kitap basyp shyǵarýdan úlken tájirıbesi bar. Osy baspadan shyqqan "Meniń Qazaqstanym" toptamasy kópshilikke belgili. Elimiz tarıhynyń jarqyn betteri, onyń mádenıeti, salt-dástúri men turmysy, biregeı geografıalyq nysandary jáne basqalary týraly málimetterdi bizdiń kórkem bezendirilgen álbomdardan tabýǵa bolady. Bizdiń osy tájirıbemiz "Ólketaný" sıaqty jańa qyzyqty pándi qalyptastyrýǵa úlken kómegin tıgizdi. Osy oqýlyqty bizben birge jasap shyǵarǵan ǵalymdarǵa, avtorlarǵa, ekspertterge úlken alǵysymyzdy bildiremiz", – dedi "Almaty kitap baspasy" JSHS-nyń bas redaktorynyń orynbasary Almıra Sýjıkova.
Oqýlyqqa tórt pán kiriktirilgen
Oqýlyq Qazaqstannyń barlyq oblysy men iri qalalarynyń tarıhy men mádenıeti, ádebıeti negizinde jazylǵan. Sonymen qatar, ár oblysta dúnıege kelgen tanymal tulǵalar jaıly da aqparat bar.
Oqýlyqta tórt pán kiriktirilgen: Qazaqstan tarıhy, qazaq ádebıeti, mýzyka jáne geografıa.
Kitap avtorlarynyń aıtýynsha, "Ólketanýdy" mektepte oqytýǵa bir jylǵa 20 saǵat bólinip otyr. Arnaıy jańa maman daıarlaýdyń qajeti joq. 20 caǵattyń 12-sin tarıh pániniń mamandary júrgizedi. Jıyrma saǵattyń 5-eýi 5-synypqa, 7 saǵat 6-synyp oqýshylaryna, al qalǵan 8 saǵat jetinshi synyp oqýshylaryna arnalǵan.
Avtorlardyń pikirinshe, oqýlyq oqýshynyń óz betinshe izdenip, tereń bilim alýyna kómektesedi.
Oqýlyqty segiz muǵalim jazǵan
Almaty qalasy boıynsha jazylǵan "Ólketaný" oqýlyǵyn 8 avtor bir jylda jazǵan.
"Oqýlyqtyń qurylymdyq jaǵyn "Oı" sózimen baılanystyryp aldyq. Kitap "Oı serpin", "Oı qazyna", "Oı qazyq", "Bilip júr" aıdarynan turady. "Oı serpin" oqýshylradyń qyzyǵýshylyǵyn arttyratyn aıdar bolsa, "Oı qazyqta" sabaqqa qatysty jalpy málimet, "Oı qazyna" aıdarynda tereńdetilgen derek berilse, "Bilip júr" bóliginde taqyrypqa baılanysty tyń málimet keltirilgen", — deıdi oqýlyq avtorlarynyń biri Gúlmıra Ryskeldıeva.
Áset Isekeshev blogerler qatarynda
Al Astana qalasy jaıynda jazylǵan oqýlyqtyń ishinde tanymal blogerler de júr. Olardyń arasynda Astana qalasynyń ákimi – Áset Isekeshev, telejúrgizýshi Maııa Bekbaeva, jýrnalıs Dınara Sátjan bar.
Jalpy, oqýlyq qazaq tilinde jazylǵan. Orys tiline aýdarma jasalypty.
Al oqýlyqtyń taralymy tapsyrys berýshi oblystarǵa baılanysty. Alaıda avtorlardyń aıtýynsha, aldaǵy ýaqytta elimizdiń mektepterindegi 5-7 synyp oqýshylarynyń barlyǵy jańa oqýlyqpen qamtylady.
