Eger de men Bilim mınıstri bolsam, onda:

 Memlekettiń bilim salasyn eń joǵarǵy deńgeıge jetkizý úshin ustazdar qoǵamnyń bedeldi tulǵasy bolýy jolynda eńbek eter edim. (Ustazdardyń jelilik marketıńte istep, kosmetıka, kıim-keshek saýdalaýyn toqtatamyn);

Damyǵan memleketterdiń jalpy orta, negizgi bilim berý oryndaryna ustazdardy tájirıbe almasýǵa jıi jiberip, elektrondy nusqadaǵy jýrnal-kúndelik, «bilimlend» sekildi júıeler men dıstansıondy jekelegen konkýrstardyń pedagogtarǵa tıimdi-tıimsiz tustaryn anyqtaı otyryp, pedagogıkalyq keńes qurý arqyly kez-kelgen sheshimdi ortaqtasa qabyldaǵan bolar edim;

Mektepterdi atestattaý, túrli salalardan keletin tekserýlerdi parasyz ótkizýdi talap eter edim;

Jańa tehnologıa, resýrstar, mýltımedıalyq kabınetter, tájirıbelik-laboratorıalyq jabdyqtal­ǵan oqý kabınetterin jaraqtandyrýǵa birinshi kezekte qarjy bólip, onyń talan-tarajǵa túspeýin, aıqyn maqsattarǵa jumsalýyn qadaǵalap otyrar edim;

Áskerı qyzmetkerler sekildi muǵalimderdiń barlyǵyn derlik biryńǵaı forma kıýin jáne ustaz­ǵa tán belgili bir shender (kadet korpýstary sekildi) berýdi qolǵa alar edim. (Qazir qaı muǵalimniń qandaı laýazymda ekenin aıyrýdan qaldyq);

Zeınetke 50 jastan shyǵaryp, olarǵa shetelge joldama berýdi kásipodaqtarǵa mindetter edim. Iaǵnı zeınetker muǵalimderdi avtomatty túrde trenerlik kýrstardy júrgizýge, jas mamandardy úıretýge jibergim keledi. (Árıne, óz qalaýymen. Birden zeınetke ketken ustazdyń dıpressıaǵa shaldyǵyp, beınetiniń zeınetin kóre almaı ketip jatqandyǵyn baıqap júrmin. Bul – úlken qıanat);

Qaǵazbastylyqtan qutylýdyń jolyn qarastyryp, bir synypqa eki synyp jetekshisin biri tárbıege, ekinshisi bilimge jaýap beretindeı etip taǵaıyndaǵan bolar edim;

Keńestik zamandaǵydaı balalardy eńbekpen tárbıeleýdi qaıta jandandyrar edim. Óıtkeni qazir balalar eńbekke erte aralaspaǵandyqtan áljýaz, iske ebi joq kúıde qalyptasyp jatyr.

Jas mamandardyń báriniń paıyzy tómendetilgen, bólip tóleýge múmkindik beriletin pátermen qamtylýyn qolǵa alar edim. Olardyń alańsyz jumys jasaýy úshin balabaqshalar saldyryp, nesıe alýyna tosqaýyl jasar edim. (Ókinishke qaraı, búgingi tańda nesıe muǵalimniń otbasyn qurýyna, ustazdyq bedeline, jumys barysyna óz kesirin tıgizýde);

Mektep dırektorlarynyń jas mamandardy jumysqa alý úshin para talap etýin toqtatyp, laýazymdyq mindetterinen ózge de jumystarǵa moıyn burǵyzbastaı etip, ıaǵnı ustazdar jergilikti basqarý organdaryna emes, tek Bilim mınıstrligi men bilim bólimderine ǵana baǵynýyn qadaǵalaıtyn edim;

Ár mekteptegi sany bar, sapasy joq orynbasarlardy azaıtyp, tek ádistemelik kómek beretin basshy men ádistemelik kabınet meńgerýshisin ǵana qaldyrar edim;

Mektepterdiń barlyǵyn derlik bir aýysymǵa aýystyryp, ekinshi aýysymda ustazdardy tájirıbe almasý, daıyndalý, sporttyq oıyndar, baseın, dıskoteka, klasıkalyq bı, hıp-hop sıaqty fızıkalyq daıyndyqtaryn shyńdaı túsetin sport túrlerine baǵyttaıtyn edim;

Oqýshylardyń birkelki mektep kıimin ulttyq naqyshta tiktirter edim;

Ata-ananyń muǵalimderge beıbereket talap qoıýyn toqtatyp, balasynyń ustazdar bedelin aıaq asty etýin toqtatý arqyly tárbıeniń negizgi bóligin ata-ananyń ózine júkter edim; 

Eń negizgi ustanymym: sabaqtyń eń basty quramynyń ulttyq-rýhanı pedagogıkamen ushtasýyn qalyptastyra otyryp qurylýynyń negizge alynýyn mindetteıtin edim. Ulttyq oıyn, ımandylyq, tarıh, óner, basqa tilder men zamanaýı tehnıkadan buryn, ilgeri oqytylýyna mán berip, óz ana tilin jete meńgergennen keıin ǵana ózge tilge bet burýdy talap eter edim; 

Áleýmettik jaǵdaıdy aıtpaı ketýge bolmas. Saǵat sanyn 15-16 saǵat jasaı otyryp, stavkalyq aılyq jalaqyny muǵalimniń eńbegi men ótiline qaraı jyl saıyn artyp otyrýyn qadaǵalar edim.

Sońǵy jyly aktýaldy bas aýrýy bolǵan attes­tasıany múmkindiginshe toqtatyp, ustazdyń bedelin túsiretin birden-bir osy máseleni túbirimen joıar edim.

Qazirgi tańda «qaryn ashyryp» júrgen birqatar máselelerdi men osylaı shesher edim. Al siz mınıstr bolsańyz qandaı áreketterdi qolǵa alar edińiz? 

Avtory:Botagóz Álimbaeva

Derekkóz: zamana.kz