Qazaqstan Respýblıkasynyń
Premer-Mınıstri
B. Á. Saǵyntaevqa
DEPÝTATTYQ SAÝAL
Qurmetti Baqytjan Ábdiruly!
Bıyl bas qalamyz El ordasy Astananyń 20 jyldyǵyn el bolyp atap ótýdemiz. Elbasynyń erik-jigeriniń, úzdiksiz qoldaýynyń arqasynda Elimizdiń ordasy, ásem qala Astana qazaq eli bolashaǵynyń qalasyna aınaldy.
Osydan 10-15 jyl buryn, elimizdiń ishki aımaqtarynan kelgen bizdiń otandastarymyz, alys jaqyn shetelden elim dep kelgen qandastarymyz, úkili úmittiń jeteginde, táýelsizdigimizge myń táýbe jasap, Astanany aınala qonǵan edi. Búgindegi arý Astanamyzdy salǵan tek belgili arhıtektorlar men sheneýikter ǵana emes, sonymen qatar júzdegen qarapaıym jumysshylardyń da qajyrly eńbegi. Astanany óz qoldarymen qalaǵan adamdardyń barlyǵy birdeı osy qaladan úı, páter alýǵa qol jetpeıdi. Astananyń otymen kirip, kúlimen shyǵyp júrgen myńdaǵan azamattarymyz osy Astana mańyndaǵy aýyldarda turady. Olardyń da jurt qatarly jaqsy ómir súrýge tolyq quqyqtary bar.
2012 jyly Elbasy, osy aýyldardy aralap, Úkimetke Astana aglomerasıasyn damytýdyń keshendi josparyn jasaýdy tapsyrdy. Ol óz sózinde: «Astana aglomerasıasynyń arnaıy keshendi josparyna 20 eldi meken kiredi, ony damytýǵa memleket tarapynan 40 mlrd qarjy josparlanyp otyr. Astanaǵa jaqyn ornalasqan aýyldarǵa adamdar kóship kelip, turaqtap jumys isteýi úshin barlyq múmkindik jasalýy tıis. Úlken qalalardyń mańaıyna shoǵyrlaný álemde bar úrdis», - dep atap ótken-di.
Sol ýaqyttan beri Úkimet qabyrǵasynda osy taqyrypqa baılanysty talaı jıyn ótti. Biraq bul jıyndardan adamdardyń ómiriniń ózgergenin kórmedik.
Búginde Astana túbine shoǵyrlanǵan aýyldarda halyqtyń sany kúrt ósýde. Bir ǵana mysal, Qoıandy aýylynda 1999 jyly 319 turǵyn bolsa, búginde, tek resmı málimet boıynsha, 22000 myń adam, al, beıresmı derek boıysha. Úlken ókinishke oraı, adam sanymen birge bul aýyldarda áleýmettik, ınfroqurylymdyq problemalar da birge ósýde. Bul aýyldan 10 shaqyrym jerdegi Astananyń keıbir kósheleri bir jylda eki ret jóndelse, 15 jylda bul aýyldyń ishindegi uzyndyǵy 154 shaqyrym joldyń 3,5 shaqyrymyna ǵana asfált tóselgen. Osy jolmen kúzde bes shaqyrym batpaq keship, qysta borandatyp, qar keship balalar mektepke barady. Aýyldyń qıyr shetine ornalasqan 900 oryndyq mektepte 2700 oqýshy bilim alýda, tek 1-synypta ǵana 16 synyp bar. Aýyldyń tazalyǵy, aýyz sý, oqýshylardy tasymaldaıtyn kólik, jol, aýyldaǵy krımınaldyq ahýal sıaqty máseleler talaı ýaqyttan beri aıtylyp keledi, biraq áli tolyq sheshimin tapqan joq. Osy olqylyqtar joǵaryda atalǵan bir ǵana aýyl emes, Astanany aınala qonǵan Talapker, Qajymuqan, Qosshy, Qaraótkel, Taıtóbe sıaqty aýyldarǵa da tán.
2017 jyly 31 qazanda Úkimet otyrysynda Astana aglomerasıasynyń terıtorıalyq sqemasy maquldandy.Bul aımaqtyń sheńberine 124 eldi meken enip, 2030 jylǵa aglomerasıa halqynyń sanyn 2mln-ǵa jetkizý josparlanyp otyr. 2030jylǵa deıin Astana aýmaǵyndaǵy iri ónerkásip jáne óndiris obektilerin jańadan qurylatyn úsh ındýstrıalyq aımaqqa kóshirý josparlanýda.
Alaıda, osy ındýstrıalyq aımaqtardiń biri 35000 myń halqy bar Qoıandy aýylyn aınalyp ótip, 86 ǵana turǵyny bar Jaınaq aýylyna, endi biri 15000 halqy bar Talapkerge emes, 854 adamy bar Tóńkeris aýylyna ornalasatyn bolypty. Árıne ındýstrıalyq aımaqqa oryn izdegende temir joldyń toǵysy, taǵy basqa da ınfroqurylymdyq, ekonomıkalyq kategorıalar negizge alynǵan bolar. Esterińizge sala keteıik, eń joǵarǵy ekonomıkalyq kategorıa – ol adamnyń eńbegi, temirdi de, kómirdi de naǵyz qundylyqqa aınaldyratyn adamnyń eńbek kúshi.
Qurmetti Baqytjan Ábdiruly!
Keshe ǵana Úkimet 2019-2023 jyldarda Astana qurylysynyń keshendi josparyn bekitti. Osy oraıda, Aqjol fraksıasynyń mynadaı suraqtaryna jaýap berýlerińizdi suraımyz:
- Astana qalasynyń, Astana aglomerasıasynyń perspektıvalyq josparyna qala mańyndaǵy halqy tyǵyz ornalasqan aýyldar endi me?
- Infraqurylym (jol salý, jylý, sý tartý) jáne mádenıet oshaqtaryn salý jumystaryna qarjy qarastyrylǵan ba?
- Osy aýyldarda oqýshylardyń sanyna sáıkes mektepterdiń qurylystaryna qarjy bólingen be?
- Elbasynyń bes áleýmettik bastamasyna sáıkes bul aýyldar gazdandyrý josparyna engizilgen be?
- Joǵaryda atalǵan máseleler qarastyrylǵan bolsa, olardyń oryndalý merzimi qandaı?
Qurmetpen,
«Aq jol» QDP fraksıasynyń depýtattary
