Kúzdiń basynda bıliktegi aýys-túıistiń ıisi shyǵa bastaǵanda joramal jasap, árkim óz nusqasyn usynǵan edi. Jel turmasa, shóptiń basy qımyldamaıdy, ıá, aýys-túıis boldy. Birinshi bolyp Prezıdent ákimshiliginde otyrǵan Ádilbek Jaqsybekov zeınetkerlik jasqa tolyp, qyzmetinen bosatylǵan edi. Artynsha Astananyń ákimi, elimizdiń qarjy mınıstri aýysyp, kútpegen «tosyn syı» jasady. Taǵy da aýysýlar bola ma? Qandaı ózgeris kútip tur? Saýaldarymyzǵa saıasatker Ámirjan Qosanov jaýap berdi.
-Qyrkúıektiń basynda bılikte azdy-kópti aýys-túıis boldy. Jańa taǵaıyndaýlardan aıtarlyqtaı ózgeris kúte alamyz ba?
-Senimnen ábden aırylǵan ári ekonomıkany túbine jetkizýge shaq qalǵan úkimet quramyndaǵy birdi-ekili mınıstrdi aýystyrý bılik qyzmetine, onyń sapasyna túbegeıli ózgeris ákeledi dep oılaý ábestik bolar.
Menińshe, bul kadrlyq aýysýlarǵa prezıdent ákimshiliginiń jetekshisiniń ornynan ketýi basty sebep bolyp otyr. Jaqsybekov ornynan ketpegende Isekeshov kelmes edi. Ol ákimdikten joǵarǵy jyljymaǵanda ornyna Sultanov kelmes edi. Sultanov jyly ornyn aýystyrmaǵanda ornyna Smaılov otyrmas edi.
Sondyqtan da bul aýysýlardan úkimet jumysyn jaqsartýǵa arnalǵan sebep-saldar izdemeı-aq qoıǵan durys bolar: bári de amalsyzdan jasalǵan oryn almasýlar.
«Osy qyzmette Pálensheev Túgensheevten góri jaqsy jumys atqarady» degen ýáj joq munda.
-19 qyrkúıekte QR Qarjy mınıstri bolyp Álıhan Smaıylov taǵaıyndaldy. Taǵy da aýysýlar bola ma?
-O jaǵyn aldymen Qudaı, sosyn prezıdent biledi. Bizdegi qadrlyq ózgeristerde eshbir qısyn ne birizdilik joq. Bári de bir adamnyń qolynda, sondyqtan boljap aıtýdyń ózi múmkin emes.
Máselen, osy ózgeristerge deıin «Prezıdent ákimshiliginiń jetekshisi Jaqsybekov zeınetkerlikke ári búdjetke qaryz bolyp ketedi» dep kim aıta aldy?!
Mınıstr, ákimdi halyq saılap otyrǵan joq. Halyq úshin bul aýysýlar esh ózgeris ákelmeıtin bolǵan soń belsendilik tanytatyndar da az. Qashan halyq el mınıstrin ózi tańdaı alady?
Bul ózi saıası astary bar másele.
Ol úshin biz, demokrattar aıtyp júrgendeı, úkimet quramyn parlamenttik saılaýda jeńiske jetken partıa qurap, belgili bir merzimge ujymdyq jaýapkershilikti óz moınyna alýy tıis. Óz ýádelerin oryndaı alsa, kelesi saılaýda halyq ol partıany qoldaıdy, qolynan is kelmese, ol partıaǵa daýys bermeı qoıady. Mine, halyq bıligi osyndaı dástúrden quralady.
Ondaı demokratıalyq ózgerister ornyqpaı, kadr máselesindegi beı-bereketshildik, jershildik, rýshyldyq, klandyq sekildi teris qubylystardan, sondaı basshylardyń bilimsizdigi men biliksizdiginen, túptep kelgende búkil basqarýshy organdardyń júgensiz jaýapsyzdyǵy men jan-jaǵyn jalmap jatqan jemqorlyǵynan birjolata qutyla alamyz.
A.Taýbaı
