Sákenniń 100 jyldyǵyna arnalǵan músháıranyń beınejazbasy tabyldy, dep jazady Qamshy.kz aqparat agenttigi sakenmuseum.kz-ke silteme jasaı otyryp.

Belgili qazaq aqyny Jeńis Qashqynovtyń balasy, aýdarmashy, jýrnalıs Ernat Qashqynov Sáken Seıfýllınniń 100 jyldyǵyna arnalǵan Respýblıkalyq músháıranyń beınejazbasyn Sáken Seıfýllın mýzeıine ákelip tapsyrdy. Bul beınetaspa Jeńis aqynnyń jeke muraǵatynan tabylǵan. Sáken Seıfýllınniń 100 jyldyǵyna arnalǵan Respýblıkalyq músháıra Qaraǵandy oblysy Jańaarqa aýdanynyń ortalyǵy Atasýda 1994 jyly uıymdastyrylǵan.

Sáken Seıfýllın mýzeıiniń dırektory, aqyn, Memlekettik syılyqtyń laýreaty  Nesipbek Aıtuly beınetaspany erekshe qýanyshpen qabyldap, rýhanı máni zor qundy dúnıeni mýzeıge tabys etken Ernat Qashqynovqa sheksiz alǵysyn bildirdi. Beınejazbada jyr dodasynda óleńderin oqyǵan 25 aqynnyń beınesi bar. Zyrlaǵan ýaqytta turlaý bar ma deseńizshi. Sodan beri shırek ǵasyr ótti. Sondaǵy jyr dodaǵa qatysqan Ǵafý Qaıyrbekov, Asqar Egeýbaev, Kákimbek Salyqov, Jeńis Qashqynov qatarly aqyndar búginde baqılyq bolǵan. Rýhanı qazynaǵa jáne ákeden qalǵan muraǵa jaýapkershilikpen qaraıtyn Ernat Qashqynovtyń eńbegine el rıza bolary anyq. Ótken tarıhtyń kýásindeı bolǵan atalmysh beınetaspa aldaǵy ýaqytta el kádesine jarary sózsyz.

Alash Tursynáli