"Neshe balańyz bar?" Osy suraqty alǵash kezdesip, tanysqan jandar birine-biri jıi qoıady. Bizdiń bala kezimizde de qoıyldy, qazir de qoıylady. Máselen, 31 arnadaǵy «Qalaýlym» baǵdarlamasynda qyzdar men jigitter birine-biri neshe bala josparlaısyz dep tikeleı surap jatady. Jaýap bergen qyzdar bir ul, bir qyz nemese úsheý dep sanyn kesip aıtady. Allanyń bergenin alamyz degendi aıtatyndary myńnyń ishinen bireýi ǵana. Ejelde qarıalar bul suraqty da, suraq qoıýshy adamdy da jaqtyrmaı, «Qudaıǵa shúkir, bar ǵoı, meniki emes Allaniki» dep sanyn atamaı jaýap beretin.

Ata-baba saltynda qazaq balasyn (urpaǵyn) sanamaıdy, sanyn aıtyp maqtanbaıdy. Oǵan dálel retinde erteden jetken mynadaı bir áńgime bar: Ertede Dáýit paıǵambar (Alladan jetken tórt kitaptyń ekinshisi «Zabýr jyrlarymen» belgili) atamyzdyń otyz uly bolypty. Namaz oqyp turyp artyna burylyp qarasa artynda turǵan otyz ulyna kózi túsip, júregine meniń balalarym ózgelerge qaraǵanda qandaı kóp degen menmendik pen astamshylyq enipti. Árıne Alla ondaıdy qalamaıdy. Sol astamshylyqtyń saldarynan Dáýit paıǵambar bir kúnde otyz ulynan túgel aırylyp, zarlap qalypty. Sodan Dáýit Atamyz táýbesine kelip, kúndiz de, túnde de Alladan keshirim surap, tynymsyz zarlap, Alladan urpaq suraıtyn bolypty. Alla keshirim jasap, Dáýit paıǵambarǵa otyz uldyń ornyna dúnıedegi barlyq jan-janýarlardyń tilin bilgen, on segiz myń ǵalamdy bılegen áıgili Súleımen patshany beripti.

Atalarymyz «Jaqsy sóz, jarym yrys» degen. Ata-baba saltyn saqtap, Alladan ul-qyzdy molynan surap, uly dalamyzdy «qaradomalaqtarǵa»  toltyrǵandaryńyz jón bolady. Baǵa almaımyz dep, qaýiptenýdiń túkke de qajeti joq. Ár bala myna dúnıege óz nesibesimen keledi. «Bir qozy  dúnıege kelse, bir túp jýsan artyq shyǵady» degen qazaq maqaly bekerge aıtylmaǵan.

Qojyrbaıuly Muhambetkárim, Mańǵystaý