Jambylda ózbekstandyq erli-zaıypty qul ıelenýshilerden jábir kórgenin aıtyp shaǵymdandy. Sózderine sensek, bes aı boıy mal baqtyrǵan qaltaly kásipker olardy uryp-soǵyp, jalaqylaryn bermeı zar ıletken. Al qashyp ketpes úshin bireýin úıde kepilde ustady deıdi. Ala taqıaly aǵaıynnyń erkinen tys jumysqa jegilgenderi ras pa? Bıznesmenniń ózi ne deıdi? KTK arnasynyń jýrnalıseri anyqtap kórdi.
Ótken jyly Gúlzıra esimdi áıeldiń malyn baqqan azamat jubaıyn ertip aqsha tabýǵa bıyl taǵy kelgen. Alaıda bul joly qojaıyny etken eńbektiń aqysyn bermeı zar ıletti deıdi. Kók tıyn buıyrmasyn bilgen erli-zaıypty qashyp ketip, biraq ustalyp qalady. Sol úshin ekeýin jumys berýshiniń balasy sabap tastaǵanyn aıtady.
-Uryp tastady hotýn ekeýimizdi. Dýbınkamen urdy. Sıyr joq dep urdy, - dedi Ózbekstan azamaty Rasýljan Sháripov.
Rasýljannyń sózinshe, bul oqıǵadan keıin kásipker qysymdy kúsheıtken. Iaǵnı malshy qashyp ketpes úshin onyń saýynshy áıelin úıden shyǵarmaı kepilde ustaǵanyn aıtady.
-Eki balam bar, anam bar. Ne qylamyz endi? Kómek beretin adam joq, - dedi Ózbekstan azamaty.
Kóz jasyn kól etken 44 jastaǵy azamat aýyldaǵy sút satýshy belsendi kelinshekten kómek berýdi suraıdy. Tilshilerdi shaqyryp, polıseılerge de habar bergen sol kisi. Sóıtip, jalshy quzyrly oryn ókilderin ertip baryp, kepilde otyr degen áıelin shyǵaryp aldy.
Al jumys berýshi áıelmen tildesý múmkin bolmady. Tóbe kórsetken onyń kelini "Úıde adam joq" dep qysqa ǵana jaýap qaıyrdy.
Ózbekstan azamattary aýdandyq ishki ister bólimine jetkizilgen soń jaǵdaı múldem ózgerdi. Jylap-syqtaǵan jábirlenýshiler kútpegen jerden aıtqandarynan aınydy. Olardyń nelikten bulaı etkenderi túsiniksiz.
-Tergeý barysynda Ózbekstan azamattaryn eshkimniń erkinen tys ustamaǵanyn, jalaqyny ýaqytyly ári tolyq kóleminde alǵandaryn aıtty. Sonymen qatar, júrgizilgen sot-medısınalyq saraptama nátıjesinde olardan eshqandaı dene jaraqattary anyqtalǵan joq, - dedi Jambyl oblystyq İİD baspasóz hatshysy Gúlsara Muhtarqulova.
Otanyn saǵynǵandardyń hıkaıasy munymen bitpeıdi. Ekeýi Qazaqstanda zańsyz júrgenderi úshin 30 táýlikke qamaldy. Sondaı-aq Ózbek azamataryn zańsyz jumysqa tartqany úshin bıznesmen de qomaqty aıyppul tóleıtin boldy. Onyń kólemin sot sheshpek.
