Búgin Qazaqstan musylmandary dinı basqarmasynyń tóraǵasy Serikbaı qajy Oraz Jambyl oblysyna 2 kúndik is-saparmen bardy dep jazady Qamshy.kz aqparat agenttigi QMDB-nyń baspasóz qyzmetine silteme jasap. 

Bas múftı bastaǵan din qyzmetkerleri Jambyl oblysy ákiminiń mindetin atqarýshy Bekbolat Orynbekovpen kezdesti.
Kezdesýde óńirdiń qazirgi dinı ahýaly, meshit-medreselerdiń jumysy sóz boldy. Bekbolat Serikbekuly oblysta 295 meshit bar ekenin, onda 400-den astam ımam qyzmet etip jatqanyn jetkizdi. 

"Qurmetti Serikbaı qajy Satybaldyuly! Kıeli Taraz shaharyna qosh keldińiz. Sizdiń saparyńyz qasıetti Áýlıeata eliniń rýhanı ómirine rýhanı serpin beredi dep sanaımyn. Búginde oblys ákiminiń tapsyrmasymen óńirimizde dinı salada irgeli jobalar júzege asyp jatyr. Respýblıkaǵa tanymal teolog-ǵalymdardy arnaıy shaqyrtyp, dinı saýatty arttyrý baǵytynda semınar uıymdastyryp kelemiz. Din qyzmetkerleriniń de áleýmettik jaǵdaıyna kóńil bólip kelemiz", - dedi oblys ákiminiń mindetin atqarýshy Bekbolat Orynbekov.

Óz kezeginde Bas múftı Serikbaı qajy Oraz ımamdardy elektrondy attestasıadan ótkizý jańa jumys jobasy Jambyl oblysynan bastalǵanyn baıandady.

"Rasynda, elimizdegi joǵary jáne orta bilim beretin dinı oqý oryndarynda Islam baǵytynda ilim alýǵa tolyq múmkindik bar. Shetelge baryp, sarsańǵa túsýdiń qajeti joq. Medreselerimiz kolej deńgeıine kóterildi. "Nur Múbárak" ýnıversıtetinde magıstrlik, tipti doktorlyq dáreje alyp shyǵýǵa bolady. Qazir bizdiń ýnıversıtetimiz ben medreselerimizdi jyl saıyn 500-ge jýyq maman bitirip shyǵady. Demek, biz bar joǵy birneshe jyl ishinde 2600 meshitimizdi din qyzmetkerimen tolyq qamtamasyz etetin bolamyz", - dep atap ótti Bas múftı Serikbaı qajy Oraz.