Portýgalıanyń Lıssabon jáne Sıntra qalalarynda qarashanyń 16-y men 25-i aralyǵynda ótken 12-shi halyqaralyq LEFFEST kınofestıvaliniń jeńimpazdary anyqtaldy. Festıváldiń «Úzdik fılm» júldesi qazaqstandyq rejıser Emır Baıǵazınniń «Ózen» fılmine buıyrdy. Atalǵan kınotýyndy festıváldiń negizgi konkýrsyna qatysyp, Eýropa, Azıa, Soltústik jáne Ońtústik Amerıka elderiniń fılmderimen úzdik atanýǵa talasty.
«Úzdik fılm úshin bas júldemen Emır Baıǵazınniń «Ózen» fılmi marapattalady. Erekshe mánerde túsirilgen tamasha fılm. Bul týyndy bizdi ózektiligimen, joǵary deńgeıimen birinshi kadrdan-aq tań qaldyrdy», - dedi sahna tórinen qazylar alqasynyń múshesi Marta Argerıh.
Aıta ketsek, qazylar alqasynyń quramyna ónerdiń túrli salalarynda jumys isteıtin qaıratkerler kirdi, olar: Ýolter Salıs jáne Djonatan Lıttel esimdi rejıserler, amerıkandyq aktrısa jáne ánshi Krısta Bell, argentınalyq pıanıs Marta Argerıh, dırıjer Sıtven Kovachevıch jáne sýretshi Djordj Kýeros.
Jalpy LEFFEST kınofestıvalinde bar joǵy úsh júlde – «Úzdik fılm» (kıno tilindegi eń ınovasıalyq jáne kórkem túsirilgeni úshin), «Qazylar alqasynyń úlken júldesi» (kórkemdik jaǵynan erekshelengeni úshin) jáne «Arnaıy júlde» tabystalady. Aıta ketsek, Emır Baıǵazınniń «Aslannyń sabaqtary» fılmi 2013 jyly festıváldiń «Qazylar alqasynyń úlken syılyǵy» júldesimen marapattalǵan bolatyn.
Sonymen qatar, festıváldiń marapattaý rásiminde «Álemdik kınematografqa qosqan úlesi» júldesi otandyq rejıser Dárejan Ómirbaevqa tabystaldy. Aıta ketsek, bul festıválde rejıserdiń retrospektıvasy uıymdastyrylǵan bolatyn.
Esterińizge sala ketsek, «Ózen» fılminiń álemdik tusaýkeseri Venesıa kınofestıvali sheńberinde ótken bolatyn. Bul festıváldiń «Kókjıekter» baǵdarlamasynda Emır Baıǵazın úzdik rejıser atandy. Al fılmniń Soltústik Amerıkadaǵy tusaýkeseri ústimizdegi jyly qyrkúıek aıynda Halyqaralyq Toronto kınofestıvali aıasynda ótti. Kınotýyndy festıváldiń «Tuǵyrnama» («Platforma») konkýrstyq baǵdarlamasynda kórsetilip, qazylar alqasynyń qurmetti atalymyna jáne Screen Daily táýelsiz kınosynshylardyń reıtıńisi tiziminde aldyńǵy qatardan kórindi. Jyl saıyn ótetin 12-shi Asia Pacific Screen Awards saltanatynda «Ózen» fılmi «Rejıssýradaǵy tabysy úshin» syılyǵymen marapattaldy. Fılmniń azıalyq tusaýkeseri Tokıo kınofestıvaliniń konkýrstyq baǵdarlamasy aıasynda ótti. Al Los-Andjelestegi Asian World Film Festival kınofestıvalinde «Ózen» fılmi qazylar alqasynyń júldesine – «naǵyz kıno tilimen beınelengen kóńilińdi birden baýrap alatyn fılm» júldesine ıe boldy.
Fılmniń jaryqqa shyǵýyna birneshe memleketter atsalysty, olar: Qazaqstan (QR Mádenıet jáne sport mınıstrligi, Sh.Aımanov atyndaǵy «Qazaqfılm» AQ, Emir Baigazin Production), Norvegıa (Norsk Filmproduksjon) jáne Polsha (Madants). Bul týyndy senarı kezinde MPA APSA Azıa-Tynyqmuhıttyq kınoassosıasıasy grantynyń qoldaýyna ıe boldy. 2017 jyly maýsym aıynda bul joba alǵash ret Karlovy Vary Halyqaralyq kınofestıvaliniń kınonaryǵynda tanystyrylyp, ol jyly qyrkúıekte kınojoba Varshava halyqaralyq kınofestıvali kınonaryǵynda Pitch and Meet jobalar baıqaýynda birinshi oryndy ıelengen bolatyn. Kartınanyń post jumystary 2018 jyly jaz aıynda Polsha kınematografıa ınstıtýtynyń qarjylaı kómegimen Varshavadaǵy Orka jáne Dreamsound stýdıalarynda júrgizildi.
