2018 jyldyń 2 naýryzynda "Asyl arna" telearnasynyń dırektory Muhamedjan Tazabek tuńǵysh qyzy Aıshany uzatty. Uzatý toıǵa qazaqtyń beldi aıtysker-aqyndary, ánshi-jyrshylary, qoǵam belsendileri jınaldy.
Toıdyń kýási bolǵan ár azamat jelidegi paraqshasynda sýrettermen ári vıdeolarmen bólisip jatty. Al "toı qalaı ótti, Muhamedjan Tazabek qyzyn qalaı shyǵaryp saldy?" degen saýalǵa "Shabdaly" fılminiń rejıseri Jandos Qusaıynnyń jazbasy jaýap bolar degen oımen Qamshy.kz aqparat agenttigi atalmysh jazbany oqyrman nazaryna usynady. Jazba mazmuny tómendegideı:
2 naýryz eńbek sińirgen qaıratker, aqyn Muxamedjan Tazabektiń tuńǵyshynyń uzatý toıy ótti. Toı - ulttyq dıplomatıanyń kórinis berer sáti ǵoı. Súısiný men syn, kúlý men jylaý, qýaný men jabyrqaý qatar júredi.
Jalpy, toıǵa kelgen jurttyń basty eki syny bar: "qyzy qandaı eken?” jáne "áke-sheshesi qalaı shyǵaryp salar eken?".
Keshe qyz uzatýǵa kelgen kóptiń kózinde osy suraq turdy. Al Muxamedjan aǵa Aıshanyń amanatyn kúıeý balaǵa tapsyrar tusta sóz aldy. "Qyzymdy qalaı ósirdim, qandaı tárbıe berdim? Bul týraly aıta berýge bolar edi, biraq onyń jaýabyn izdegen adam qyzymnyń boıynan kóredi. Biz shamamyz kelgenshe jaqsy kıim kıip, taza taǵam jegizip, qazaqy qylyp ósirýge tyrystyq. Al budan bylaıǵy ómiri endi kúıeý balanyń qolynda" dedi ol. Sosyn qasyndaǵy qońyr sandyqty ashyp, ondaǵy qyz jasaýynyń basty-basty degenderin ózi kórsetip, onyń mańyzyn túsindirdi. Aldymen Quran kitapty shyǵardy.
"Bul qasıetti Quran. Kez kelgen otbasynyń tórinde turýy kerek dep sanaımyz. Munyń ishinde adamnyń eki dúnıedegi baqytqa jetý joly jazylǵan. Bul keshegi Abaıdyń, Shákárimniń, Iassaýıdiń baqyt týrasyndaǵy suraqtaryna jaýap bergen izgi kitap. Bul jaqsylyqqa jeteleıtin nur. Endeshe, eki balama osy kitapty syılaımyn" dedi. Sosyn xadıster jınaǵyn aldy.
"Allanyń ardaqty paıǵambarynyń ómiri - adamzatqa úlgi. Quranda adam balasynyń baqytqa jetýi týraly jazylsa, myna Saxıx Býxarıdiń xadıster jınaǵy sol baqytqa jetý joldaryn úıretedi. Bul kitap - adam balasynyń temirqazyǵy ispetti. Aıyrylmaı ustasa túbi shýaqty kúnderge, baqytty sátterge toly ǵumyr keshedi. Jas otbasyǵa syılaǵymyz kelgen jasaýdyń basyndaǵy ekinshi kitap osy”. Muxamedjan aǵa endi sandyqtan Abaıdyń óleńder jınaǵyn alyp kórsetti.
"Biz qazaqpyz. Óz ultymyzdan shyqqan nebir ǵulamalar bar. Abaı - sonyń birigeıi. Onyń osy bir óleńder toptamasyn únemi oqyp júrsin dep syılap otyrmyz. Qaı otbasyda qazaqylyq saltanat qursa, sol otbasyda keńdik pen parasatty qarym-qatynas ornaıdy".
Otyrǵan jurt siltideı tynyp ákeniń sózderine uıyp tyńdady.
"Tórtinshi kitap - Elbasynyń eńbegi jazylǵan kitap. Bul shyǵarmany da jas otbasynyń jasaýynyń basy etip berip otyrmyz. Sebebi, qandaı qoǵam basshysyn qadir tutyp, oǵan baǵynsa, sol qoǵamda bereke ornaıdy. Bizdiń basshymyz - Nursultan Ábishuly Nazarbaev. Onyń osynsha jyldar boıy memleket, ult úshin istegen qyzmetin bilip, óskeleń urpaqqa sińire júrýimiz kerek".
Muxamedjan Orazbaıuly qońyr sandyqtan besinshi kitapty shyǵardy da jymıyp sóıledi: "Aısha - aqynnyń qyzy. Meniń osynsha jyl el aldynda júrýim, xalyqtyń súıispenshiligine bólenýim, sonaý Qonaev atamyzdan bastap, búgingi kúnge deıingi el aǵalarynan alǵan bata-tilekterdiń bárinde aqyndyǵymnyń úlesi bar. Halyq meniń aıtyskerligimdi qadir tutty, alaqanynda aıalady. Endeshe, mynaý meniń jıyrma bes jyl boıǵy túrli saxnada aıtqan óleń shýmaqtarym. Osyny oqı júrińder. Munda senderdiń ákeleriń jaıly, onyń qoǵamdaǵy qandaı da bir qubylystarǵa qatysty pikiri, kózqarasy bar".
Qońyr sandyqtaǵy taǵy bir zat et tabaq eken. Aqyn adam ony kórsetip bylaı dedi, "qonaq kútý qazaqtyń jaqsy qasıetiniń biri. Qonaqjaılyqqa aıtyp úıretpeıdi, kórsetip úıretedi. Qonaǵyn syılaǵan adam jaman bolmaıdy. Aısha úıde bolǵanda qonaq kútýden kende bolǵan joqpyz dep oılaımyn. Sondyqtan aldaǵy bolashaqta senderdiń de úılerińnen qonaq úzilmesin dep osyny syılap otyrmyz", dedi ol, ulttyq oıýmen órnektelgen et tabaqty kóterip turyp. Eń sońynda altyn ıne men jibek jipti shyǵardy. Onyń da sımvolıkalyq máni bar eken. "Áıel adam barǵan jerinde ismer bolýy kerek. Ol aldymen úı sharýasyn dóńgeletip, kóńirsitip kúlsheniń ıisin shyǵaryp, as-aýqatyn daıyndap, kórpe-tósegin kóktep otyrǵany jón.
Kúıeýiniń shalbarynyń qyry pyshaqtaı, jeıdesiniń jaǵasy appaq qardaı bolyp, kútimi kórinip tursa, ol otbasyda garmonıa bar degen sóz. Ine-jip kelinshektiń iske bekemdigimen qatar, úıdegi úılesimniń de jibin tarqatpaı ustaýynyń kórinisi" dep aıaqtady sózin alashtyń ardaqty aqyny.
Bul dúnıeler jasaýdan góri ákeniń amanaty ári ómir boıy qasterlep ótetin qundy jádigeri ispetti kórindi ózime. Jalpy, keshe kórgenim kórikti toıdyń naǵyz mysalyna jarar shara boldy.
Qyz uzatý - áke-shesheniń emtıxany sekildi ǵoı ózi. Muxamedjan aǵanyń dástúrdi jańǵyrtqan, qazaqy dıplomatıaǵa baı dýmany birazǵa deıin kóptiń kóńilinen óshpeıtin shyǵar. Bastysy, kóptiń tilegi men ákeniń asyl sózderi eki jastyń jadynda jattalyp, aldaǵy ómirlerine baǵdar bolsa eken.
Usynǵan: Gúlim Jaqan
