Memleket basshysynyń ókimimen Baýyrjan Jumahanuly Omarov Qazaqstan Respýblıkasy Prezıdentiniń keńesshisi qyzmetine taǵaıyndaldy. Bul jýrnalıser qaýymy úshin óte jaǵymdy jańalyq.  Eń basty aıtpaǵymyz –Qasym-Jomart Toqaevtyń mańaıyna qazaqtildi, ultjandy, memlekettik tilde erkin sóıleıtin, azat oıly azamattar jınala bastady.

Qazaq ádebıeti men jýrnalısıkasynda ózindik orny bar Baýyrjan Jumahanulyn jalpy qaýymǵa tanystyryp jatýdyń ózi  artyq. Jalyndy jastyq shaǵynda jýrnalısıkanyń bastaýyn «Jas Alashtan» bastaǵan ol qalaı jazýdy, qaıtip jazýdy, nege jazýdy jas  tilshilerge úıretti. Jýrnalısıkada Baýyrjan Omarovtyń ózindik jazý mektebi qalyptasty. Onyń qoltańbasy qalamger qaýymǵa jaqsy tanys. Ol sheber jýrnalıs, myqty qalamger, parasatty ustaz, tereń bilimdi ádebıetshi ǵalym jáne memleketshil azamat.

Omarov – jady myqty jýrnalıs. Qyryq jylǵy derekter men oqıǵalardy qulpyrta baıandap, shynaıy jazýdyń asqan sheberi. Ol – myqty Bas redaktor.

Baýyrjan Jumahanulynyń Bas redaktorlyǵy «Aıqyn» gazetin  basqarǵan ýaqytta aıryqsha kórindi. Gazettiń ekinshi tynysy ashyldy. Basylymda buryn-sońdy bolmaǵan taqyryptar kóterildi. Maqalalar ózektiligimen erekshelendi.

 «Aıqyn» gazetinde maǵan Baýkeńniń orynbasary bolý baqyty buıyrdy. Baýkeńmen birge jumys isteý ońaı ári qıyn. Ońaılyǵy – onyń tıanaqty ári  tynymsyz, toqtaýsyz jumys isteıtininde. Óıtkeni óziń de únemi Baýkeńe uqsap, serpindi keıipte júresiń. Qıyndyǵy – onyń únemi jaýapkershilikti sezinip júretindigi. Al basshyń tıanaqty bolsa, seniń tıanaqsyz bolýyń múmkin emes.

Jýrnalısıkada, jalpy ádebı  ortada  «Baýyrjan Omarovtyń aforızmderi» degen jalpaq uǵymǵa aınalyp ketken sóz tirkesi bar. Onyń ózin jınaq etip shyǵarsa,  bir tomǵa júk etýge bolady.

Ol bárine úlgeredi. Jedel ári uqypty jumys isteıdi. Óte saýatty. Eń kókeıge qonatyny –taza adam. Jumysta qatal, biraq ádiletti. Sol úshin ony aınalasyndaǵylar syılaıdy. Basqa qyzmetke ketip, jumys aýystyryp jatsa da, ol týraly jaǵymdy jyly áńgimeler tizbegi jalǵasa beredi.

Baýkeńdi bilgiń kelse,  tanyǵyń kelse, onyń «Qaratereń válsi»,  «11 –shi qalamush» eńbegin oqyńyz.

Sonymen búgin Baýyrjan Jumahanuly Omarov Prezıdent keńesshisi bolyp taǵaıyndaldy. Bul belestegi qıyn jumysty Omarov oıdaǵydaı adal atqaratynyna  bek senimdemiz.

...Baýkeń týraly  áńgime munymen bitpek emes.

***

Prezıdent keńesshisi týraly kerek derek

Baýyrjan Jumahanuly Omarov 1962 jyly 1 mamyrda Qyzylorda oblysy Aral aýdany Qaratereń aýylynda dúnıege kelgen. Fılologıa ǵylymdarynyń doktory (2001), profesor (2002), Qazaqstan Respýblıkasy Ulttyq Ǵylym akademıasynyń korespondent-múshesi (2013).
1986 jyly QazMÝ-dyń jýrnalısıka fakúltetin (qazirgi QazUÝ), 1998 jyly Máskeý halyqaralyq bıznes jáne aqparattyq tehnologıalar ýnıversıtetin, 2006 jyly T.Rysqulov atyndaǵy Qazaq ekonomıkalyq ýnıversıtetin támamdaǵan.
1986-1994 jyldary «Lenınshil jas» (qazirgi «Jas alash») gazetiniń tilshisi, aǵa tilshisi, aýdarmashysy, bólim meńgerýshisi, 1994-1996 jyldary QazUÝ-dyń aǵa oqytýshysy, 1998–2000 jyldary aǵa ǵylymı qyzmetkeri (doktorant), 2002-2003 jyldary profesory, 1996-1997 jyldary Qyzylorda memlekettik ýnıversıtetiniń prorektory, 1997-1998 jyldary Qyzylorda qalasy ákiminiń orynbasary – Qyzylorda arnaıy ekonomıkalyq aımaǵy ákimshilik keńesi tóraǵasynyń orynbasary, 2000-2003 jyldary Qazaqstan BǴM M.Áýezov atyndaǵy Ádebıet jáne óner ınstıtýtynyń aǵa ǵylymı qyzmetkeri, bólim meńgerýshisi, 2001-2002 jyldary «Qaınar» ýnıversıtetiniń profesory, 2003-2006 jyldary QR Mádenıet mınıstrliginiń Tilderdi damytý departamentiniń dırektory, QR Mádenıet, aqparat jáne sport mınıstrligi Til komıtetiniń tóraǵasy, 2006-2009 jyldary "Lıter-Media" JSHS atqarýshy dırektory, «Astana habary» gazeti bas redaktorynyń birinshi orynbasary, «Aıqyn» gazetiniń bas redaktory, Qyzylorda oblysy ákimi apparatynyń jetekshisi, «Qazaq gazetteri» JSHS bas dırektory, 2009-2013 jyldary QR Mádenıet jáne aqparat mınıstrligi Aqparat jáne muraǵat komıteti tóraǵasynyń orynbasary, Aqparat jáne muraǵat komıtetiniń tóraǵasy, QR Mádenıet mınıstrligi Til komıtetiniń tóraǵasy. QR Prezıdenti Baspasóz qyzmetiniń sektor meńgerýshisi qyzmetterin atqardy. 2013 jyldan bastap – QR Prezıdenti Baspasóz hatshysynyń orynbasary. 
Ǵylymı-zertteý salasy - ádebıettaný. 1993 jyly Abaı atyndaǵy Almaty memlekettik pedagogıkalyq ýnıversıtetinde "Murat Móńkeulynyń ádebı murasy" atty taqyrypta kandıdattyq dısertasıa qorǵady. 2001 jyly M.Áýezov atyndaǵy Ádebıet jáne óner ınstıtýtynda «Qazaq ádebıetindegi zar zaman aǵymy (genezıs, tıpologıa, poetıka)» degen taqyrypta doktorlyq dısertasıa qorǵady. Murat Móńkeulynyń shyǵarmalaryn, qazaq ádebıetindegi zar zaman aǵymyn, ejelgi ádebıet máselelerin zerttedi.
100-den astam ǵylymı jarıalanym men 10 ǵylymı jáne pýblısısıkalyq kitaptardyń avtory.