Ásel men Kamıla Aqtaýdaǵy qarapaıym qazaq otbasynda týǵan. Olar búginde erekshe bitiminiń arqasynda modeldik kásipte kóp-kórim jetistikke jetip júr. Qyzdar jaıly reseılik bigpicture.ru saıty jazǵan.
Qazaqstan turmaq, álemde sırek kezdesetin jaǵdaıǵa basynda bári tańǵalypty. Túsiniksizdik týyp, birshama daý-damaı bolǵan. Qyzdardyń anasy Aıman Sarqytova perzenthanada sábıin alǵash kórgende shok alǵanyn jasyrmaıdy. Buryn-sońdy bundaıdy kórmegen dárigerler de ań-tań. Eń qyzyǵy, úıdiń tuńǵyshy – Aldıardyń syrt kelbeti ózgelerden esh erekshelenbeıdi.
Qalaǵanovtar otbasynyń keıbir aǵaıyndary bir mezette sábıdiń ákesi bóten er adam, basqa ult ókili shyǵar degen oıǵa da ketken. Alaıda olardyń tuqymynda albınostardyń buryn da bolǵany anyqtalǵan. Erekshe bitim birneshe býynnan soń qyzdarǵa berilgenge uqsaıdy.
Búginde qyzdardyń úlkeni – Ásel 14, kishisi – Kamıla 2 jasta. Genetıkalyq anomalıanyń arqasynda apaly-sińlili albınostar únemi el nazarynda. Jergilikti modeldik agenttikter olardyń erekshelegin baıqap, túrli fototúsirilimderge shaqyryp turady. Áseldi alǵash túsirilimge shaqyrǵanda onyń jasy 10-da bolǵan. Sińlisiniń de ózi sekildi erekshe bolyp dúnıege kelýinen olarǵa degen qoǵamdyq nazar artqan. Búginde Áseldiń instagram-daǵy paraqshasyn 30-myńnan astam qoldanýshy oqıdy.
Keleshekte Qalaǵanovtardyń Aqtaýdan elordaǵa kóshý oılary bar. Óıtkeni qyzdar kún kózin onsha unata bermeıdi. Aqtaý ystyq ári ylǵaldy bolǵandyqtan, Ásel mektepke kúnnen qorǵaıtyn kózáınek taǵyp, qolshatyr ustaýǵa májbúr.
