Almaty. Qamshy portaly – Ońtústik  Qazaqstan oblysynyń jeke kásipkeri «Qymyz ben shubattan jasalǵan balmuzdaq óndirisi» ónertabysyna patent alý úshin ótinim tapsyrdy, dep habarlady ádilet mınıstrligi OQO ádilet departamentiniń baspasóz qyzmeti.

«Ulttyq zıatkerlik menshik ınstıtýtynyń Shymkenttegi qalalyq fılıalynyń dırektory «Ladýshkı» atty tanymal taýar belgisiniń qojaıyny, jeke kásipker S.G. Lýgınamen kezdesý ótkizdi. Kezdesý barysynda jeke kásipker S.G. Lýgınaǵa taýar belgisin tirkeý tártibi túsindirilip, odan «Qymyz ben shubattan jasalǵan balmuzdaq óndirisi» ónertabysyna patent berý týraly ótinim qabyldandy», - delingen dúısenbide mınıstrlik saıtyna jarıalanǵan habarda.

Aqparda atap kórsetilgendeı, búgingi tańda balmuzdaqtyń bul túri qala halqynyń arasynda úlken suranysqa ıe.

Buǵan deıin Qazaqstandaǵy Izraıl elshisi Israel Meı Amı túıe súti shubatty qaıta óńdeý boıynsha Izraıldiń Qazaqstanǵa patent usynýǵa daıyn ekenin habarlaǵan edi.

«Bizdiń profesor bir patentti satpaı qoıdy ol «gamal glıda» - shubattan jasalǵan balmuzdaq. Ol óte paıdaly, sýsamyrlar úshin quramynda sheker joq. Izraılde óndirilgen barlyq balmuzdaq GFR-ǵa eksporttalady. Izraıldik tutynýshylar tipti munyń ne ekenin de bilmeıdi. Biraq biz sol profesordy patentti Qazaqstanǵa satýǵa kóndiremiz dep úmittenemiz», - dedi ol 2010 jyldyń 17 aqpanynda ótken baspasóz máslıhatynda.

Elshiniń aıtýynsha, ızraıldik profesor Roven Iagıl tek shubattan jasalǵan balmuzdaqty ǵana emes, sonymen birge ıogýrtty da jasap shyǵaryp, patenttep alǵan kórinedi. Shubattan ıogýrt jasaý lısenzıasy, dep jalǵady ol, osyǵan deıin «Merkýr» kompanıasyna usynylyp kelgen.

«Merkýr» patentti satyp alǵan jáne áli kúnge deıin ıogýrtty shubattan jasap jatyr. Jáne ol ıogýrtty satyp alý óte qıyn, óıtkeni birden satylyp ketedi», - dep basa aıtty elshi.

Onyń aıtýynsha, Izraılde shubat lıtri $10 turady. Izraıl fermerleri óz óndiristerinde tek túıelerdiń shýdasyn ǵana emes, sonymen qatar terisin de paıdalanady, atap aıtqanda, baraban (dabyl) jasaý úshin jáne súıekterin dekoratıvti buıymdar jasaýǵa.

Elshiniń pikirinshe, Qazaqstanda túıelerdi asyraýdan ekonomıkalyq paıda ázirge kóriner emes. Osyǵan baılanysty ol bıznesmender men sharýalardy shubat óndirý men óńdeýge nazar aýdarýǵa shaqyrdy, sebebi, ekonomıkalyq paıdadan bólek, bul ónim densaýlyq úshin paıdaly.

«Shubat Dúnıejúzilik densaýlyq saqtaý uıymynyń aıqyndaýynsha saýyqtyrǵysh medısınalyq sýsyn dep tanylǵan, sol sebepti de ony kóbirek ishý kerek», - dep qorytyndylady Israel Meı Amı.

Derekkóz: QazTAG