Tobyl qalasy juqpaly aýrýlar stasıonarynyń dárigeri retinde qaıta biliktilikten ótken №4 Qostanaı emhanasynyń dárigeri Ǵabıt Atambýzov shilde aıynda dárigerlerdiń pnevmonıamen qalaı jankeshti kúreskeni týraly aıtyp berdi.

"Fors-major jaǵdaıyn eskerip, biz birden áriptesterimizge kómekke attandyq"

Qaraǵandy medısınalyq ýnıversıtetin oıdaǵydaı támamdap, ótken kúzde týǵan jerim – Qostanaıǵa oraldym. Jalpy praktıka dárigeri retinde qabyldaý júrgize bastadym. Alaıda mamyr aıynda emhanadaǵy jumysymnan ýaqytsha bas tartýǵa týra keldi. Adamdar aýyryp, qalada karantın bastaldy, emhana janyndaǵy provızor bólimine mamandar qajet boldy. Basshylyq usynys jasap, men yntammen osy jumysqa kelistim. Bul – dárigerge qajetti tájirıbe. Árıne, jaqyndarym úshin alańdap, qoryqtym, sol sebepti de birden olardan oqshaýlandym. Otbasyma rahmet, meniń sheshimimmen kelisip, qoldaý jasady. Bir-birimizge beıneqońyraý shalyp, sóılesip turamyz, oǵan da etimiz úırenip qaldy.

Keıinnen mobıldi brıgada quramynda shaqyrýlarǵa shyǵyp júrdim. Shilde aıynyń basynda jaǵdaı asa aýyr boldy, bir kúnde shalynatyn qońyraýlar sany myńnan asyp jyǵylatyn. Jumys tańerteńnen keshke deıin damyldamaıtyn. Sondaı kúnderdiń birinde, jumystyń sońyna qaraı telefonnan Tobyl qalasynyń juqpaly aýrýlar aýrýhanasynda pnevmonıaǵa shaldyqqan naýqastar kóbeıgeni, jaǵdaı ýshyǵyp, dárigerlerdiń úlgermeı jatqany habarlandy. Ýaqyt keshki jeti-segizder shamasy, emhanada men jáne áriptesim ekeýmiz ǵana qalǵan bolatynbyz. Habardy ala sala fors-major jaǵdaıyn eskerip, biz birden áriptesterimizge kómekke attandyq.

"Biz qazir soǵysta júrgendeımiz"

Alǵashqy kúnder asa qıyn boldy. Bólim jaqynda ǵana ashylǵan, al oblysta naýqastar sany kún sanap kúrt ósip jatty. Kún ystyq, "Jedel járdem" mashınalary birneshe saǵat qatarynan kezekte turady. İshinde – pnevmonıaǵa shaldyqqan, jaǵdaılary óte aýyr naýqastar.

Olardyń barlyǵyna jedel kómek qajet. Sondyqtan bizge demalyssyz, tańǵy segizden keshki segizge deıin tolassyz jumys isteýge týra keldi. Kúshimiz de azaıa bastaǵan sıaqty. Kúnine 70-ke deıin naýqasty tekseristen ótkizip júrdik. Las aımaqtan qorǵanys kıimimen malmandaı sý bolyp shyǵatynbyz.

Óz-ózimdi myǵym ustaýǵa ne sebep bolǵanyn bilmeımin, múmkin, jastyq pen ynta, kómek kórsetýge degen qulshynys shyǵar. Bir táýlik boıy aıaǵymnan tik turyp, kezekshiligimdi atqaryp, artynan birneshe saǵat qana demalyp, qaıtadan táýliktik kezekshilikke shyǵatynmyn. Osyndaı kezde tek moraldyq turǵydan qatty sharshaıtynmyn. Aǵa býyn áriptesterime aýyr qorǵanys kostúmderin kıip júrý ońaıǵa soqqan joq. Biz qazir soǵysta júrgendeımiz. Tek kórinbeıtin jaý – vırýspen kúresýdemiz. Sońǵy naýqas dertinen aıyǵyp shyqpaıynsha, men de osy stasıonarda bolamyn. Osylaı bul jaǵdaıdan da halyqpen birge ótermiz. Máńgi bulaı bola bermeıdi ǵoı. Dáriger retinde bul jaǵdaı men úshin úlken tájirıbe boldy. Úırengenim kóp.

"Pasıentterdiń naýqasynan aıyǵyp, aýrýhanadan shyǵýy dáriger úshin bir ǵanıbet qoı"

Men pasıentterdiń, bizdi, medısına qyzmetkerlerin, túsingenin qalar edim. Biz olardan azbyz, sondyqtan olardyń barlyǵyna birden nazar aýdarý qıyn. Kóptegen aýyr naýqastar boldy – jasy ulǵaıǵan, sozylmaly aýrýy barlar, ókpeniń zaqymdanýy 90-95 paıyz bolǵan naýqastar. Bárin qutqarý múmkin emes edi. Biz árqaısysy úshin qoldan kelgenniń bárin jasadyq jáne áli de jasap jatyrmyz. Biraq vırýs eshkimdi de aıap jatqan joq...

Medısınalyq ýnıversıtettiń birinshi kýrsynda oqyp júrgen shaǵymda prorektor, keremet dáriger jáne oqytýshy Vılen Borısovıch Molotov-Lýchanskııdiń "Dáriger – bul salqynqandylyq, meıirimge toly júrek, jyly qoldar" degen sózderi meniń júregimde máńge saqtalyp qalypty. Asa bir aýyr kezeńderde (pasıentter ártúrli bolady ǵoı), men únemi ishimnen osy sózderdi qaıtalaımyn. Kez kelgen jaǵdaıda adam bolyp qalý mańyzdy dep sanaımyn. Bireýge jyly qabaq, meıirimdi sózder, al bireýge qataldyq qajet.

Árıne, pasıentterdiń naýqasynan aıyǵyp, aýrýhanadan shyǵýy dáriger úshin bir ǵanıbet qoı. Olardyń baqyttan bal-bul janǵan júzderin, kúlip, alǵys bildirgenin kórýdiń ózi bir keremet sezim. Olardyń sózderi, shynaıy aıtqan tilekteri boımyzǵa kúsh-qýat berip, ózimizdiń qajettiligimizdi sezindiredi. Pasıentter bizdi esterine saqtap qala almaıdy, ádette tanymaıdy da, óıtkeni olarǵa biz qorǵanys kıimin kıip, bastan aıaq tumshalanyp kelemiz. Tek aýrýhanadan shyǵarar ýaqytta, olarǵa usynystar jazylǵan aýrýhana paraǵyn berý úshin kádimgi maskamen barǵan kezde, olardyń "Dáriger, siz osyndaı ekensiz ǵoı!" dep tańqala aıtqan sózderin estımin.