Qazaqstannyń konstıtýsıalyq evalúsıasy 4 kezeńnen turady. Olardyń árqaısysy kelesi kezeńderge negiz bolady. Bul týraly «Aq jol» demokratıalyq partıasy «Alash» ınstıtýtymen birge uıymdastyrǵan «Qazaq Respýblıkasynyń 100 jyldyǵy jáne onyń qurylýyna «Alash» qaıratkerleriniń úlesi» taqyrybynda ótken onlaın konferensıada aıtyldy.

«Qazaq Keńestik avtonomıasynyń 100 jyldyq mereıtoıy qazaq qoǵamynyń tarıhı jadyndaǵy birqatar máseleni ashyp otyr. Bul sońǵy jyldary bolyp jatqan qoǵamdyq-saıası prosesterge de, qazirgi Qazaqstandaǵy tarıh ǵylymynyń jaǵdaıyna da baılanysty. Qazaqstan aýmaǵynda ulttyq avtonomıa qurýdyń barlyq aspektilerin jáne osy prosestegi ártúrli saıası kúshterdiń rólin jan-jaqty qarastyratyn qyzyqty zertteýler bar. Bul – K.Núrpeıisov, M.Qoıgeldıevten bastap búgingi vırtýaldy aýdıtorıada jınalyp otyrǵan ǵalymdardyń eńbekteri», - deıdi tarıh ǵylymdarynyń doktory, profesor Ábil Erkin.

Ol osy baǵyttaǵy zertteýlerdiń teorıalyq jáne ádistemelik negizin qalyptastyrý qajet ekenin aıtty.

«Sońǵy kezde Reseıdiń ǵylymı ádebıetinde qazaqtyń qoǵamdyq qatynastyq damý deńgeıine kúmánmen qaraıtyn maqalalar paıda bola bastady. Bular qazaq dalasyndaǵy HH ǵasyrdyń basyndaǵy barlyq saıası oqıǵalardy rýaralyq kúres retinde sıpattaıdy. Bul avtorlar qazaqtarǵa qatysty burynnan umytylǵan «kırgız» jáne «kırgız-kaısak» degen etnonımderdi qaıta jańǵyrta bastady. Árıne, qazaq dalasyndaǵy ishki saıası qatynastardyń rýaralyq sıpattaryn joqqa shyǵarýǵa bolmaıdy, biraq rý-taıpalyq kúrestiń kúsheıýi kóp jaǵdaıda Reseı otarshyldyq saıasatynyń nátıjesi boldy. Qazaq elıtasy jetkilikti túrde jańaryp, zamanaýı qoǵam qurýǵa umtylǵanyna kúmán joq», - deıdi ol.

Onyń aıtýynsha, 1920 jyly Qazaq Keńestik avtonomıasynyń jarıalanýy 1917 jyly «Alash» avtonomıasynyń jarıalaýdan bastaǵan Qazaqsatnnyń konstıtýsıalyq evolúsıasynyń qadamy retinde qarastyrý kerek.

«Bizdiń túsinigimizde, Qazaqstannyń konstıtýsıalyq evalúsıasy 4 kezeńnen turady. Olardyń árqaısysy kelesi kezeńderge negiz bolady. Birinshi kezeń – 1917 jyly «Alash» avtonomıasynyń jarıalanýy. Ekinshi kezeń – 1920 jyly Reseı Federasıasynyń quramynda Qazaq avtonomıasynyń jarıalanýy. Úshinshi kezeń – 1936 jyly qazaqstan egemendi memleket mártebesin jáne odaqtan shyǵý quqyǵyn alǵany. Tórtinshi kezeń – Qazaq Sosıalısik Respýblıkasynyń memlekettik egemendigi týraly 1990 jyly deklorasıaǵa dep bekitilgen resmı quqyqtardy paıdalaný nátıjesinde qazaqstannyń táýelsizdigin jarıalaý múmkindigi paıda bolǵan. Bólshevıkter men «Alashtyń» 1918-1920 jyldardaǵy odaǵy – eki jaqtyń májbúr bolǵan odaǵy ekenine kúmán joq. Bul eki taraptyp ymyraǵa kelý saıasaty. Lenın jáne bólshevıkterdiń qazaq avtonomıasyn qalyptastyrý jáne onyń shekarasyn belgileý úderisindegi rólin asyra baǵalaýǵa da, asyra tómendetýge de bolmaıdy. «Alash» basshylary úshin basty maqsat – avtonomıa egemendigin jáne onyń shekaralaryn zańdy túrde bekitý boldy. «Alash» zıalylary osy jolda ómirlerin de qurban etti», - deıdi ol.