Qazaqstanda koronavırýstyq ınfeksıadan 186 medısına qyzmetkeri qaıtys boldy. Alaıda qaza tapqandardyń tek 9-ynyń otbasyna ǵana ótemaqy tólengen. Mundaı kóńil júdetetin statısıka búgin «Nur Otan» Partıalyq baqylaý komıtetiniń otyrysynda jarıa etildi. Partıalyqtar COVID-ben kúres boıynsha epıdemıaǵa qarsy is-sharalarǵa tartylǵan dárigerlerge aı saıynǵy jalaqyǵa qosymsha ústemeaqy tóleý, sondaı-aq osy indetti juqtyrǵan nemese sodan qaıtys bolǵan jaǵdaıda medısına qyzmetkerlerine ótemaqy tóleý máselelerin qarady.

Sonymen, Partıalyq baqylaý komıtetiniń tóraǵasy Pavel Kazansev áleýmettik medısınalyq saqtandyrý qorynan búginge deıin ınfeksıa juqtyrǵan 1093 dáriger ǵana 2 mln. teńgeden ótemaqy alǵanyna toqtaldy. Al sol kezde, naýqastanǵan medısına qyzmetkerleriniń jalpy sany 11293 adamdy qurady.

«El prezıdenti Qasym-Jomart Kemeluly Toqaev óziniń Qazaqstan halqyna Joldaýynda pandemıa týyndatqan daǵdarys bizdi kóp nársege úıretkenin atap ótti. Máselen, dárigerdiń eńbegin baǵalaı bilý, onyń mańyzdylyǵyn kúsheıtý úshin materıaldyq turǵydan qoldaý kerek. Qazaqstan Respýblıkasynyń Eńbek jáne halyqty áleýmettik qorǵaý mınıstri men Densaýlyq saqtaý mınıstriniń birlesken buıryǵy 9 sáýirde qabyldanyp qoıǵanyna qaramastan, ótemaqy tóleý jónindegi óńirlik komısıalardyń alǵashqy otyrystary tek tamyz aıynda ótti. Medısına qyzmetkerleriniń indet juqtyrýynyń alǵashqy jaǵdaılary naýryz aıynda oryn alǵan bolsa, bul máseleni osynsha sozbalańǵa salýdyń sebebi nede?! Aımaqtyq partıalyq baqylaý komısıalary búrokratıa men sózbuıdaǵa salý faktilerin qarap, kináli partıa múshelerin eń qatań jaýapkershilik sharalaryna tartýy kerek», - dedi Pavel Kazansev.

Densaýlyq saqtaý vıse-mınıstri Lúdmıla Búrabekovanyń aıtýynsha, qazirgi ýaqytta ınfeksıa juqtyrýshylardy 3 topqa bólgen. Osy maqsatqa respýblıkalyq búdjetten 3 aı merzimge qarajat qaralypty. Ústemeaqy naqty jumys istegen kezeń úshin aı saıyn esepteledi.

Óz kezeginde QR Eńbek jáne halyqty áleýmettik qorǵaý vıse-mınıstri Erbol Ospanov ústemaqy tóleýden bas tartýdyń negizgi sebepteri retinde indetti qaıdan juqtyrǵanyn kórsetpeý nemese ony juqtyrýdyń jumys barysynda oryn almaýy, derekterdi qate kórsetý jáne t.b. atady.

«Ulttyq ǵylymı medısınalyq ortalyq» AQ basqarma tóraǵasy, belgili pýlmanolog Abaı Baıgenjın de qosymsha tólemderge qatysty mańyzdy másele kóterdi. Ol UǴMO-tyń 2 aı boıy juqpaly aýrýlar klınıkasy retinde jumys istegenin, naýqastar táýlik boıy qabyldanǵanyn, al qosymsha jumys úshin Densaýlyq saqtaý mınıstrliginen ústemeaqy túspegenin aıtty.

«Tájirıbemizdi eskerip, bizge eń aýyr naýqastar jetkizildi. Bizdiń dárigerler, medbıkeler, sanıtarlar, táýlik boıy jumys istedi, óıtkeni naýqastardy emdeý kerek. Jumys stavkasy týraly oılaǵan da joqpyz. Ulttyq ortalyq bolǵandyqtan, bizde qarjylyq resýrstar bar, men shyǵyndardy ortalyq esebinen japtym. Al bul aqshany qaıtarý úshin Densaýlyq saqtaý mınıstrligine júgingengenimizde, bizge bul sizderdiń shyǵyndaryńyz, biz ony qaıtarmaımyz dedi. Óńirlerdegi áriptesterimniń jaǵdaıy qanshalyqty qıyn bolǵanyn jaqsy túsinemin. Olardyń jaǵdaıy bizden on ese aýyr. Ústemaqy tóleý sonshalyqty qıyn ba?»,- dedi Abaı Baıgenjın.

PBK múshesi, Májilis depýtaty Murat Temirjanov aımaqtarda oryn alǵan aýyr jaǵdaılardyń bir kórinisi retinde Kókshetaý qalasyndaǵy medısınalyq mekemeni mysalǵa keltirdi. Mundaǵy medısına qyzmetkerleriniń jumys kúniniń basynda jáne jumystan soń IFA (qannyń ımmýnofermenttik taldaýy) ádisimen qajetti testileýden ótýge múmkindikteri bolmaǵan.

«Kókshetaý aýrýhanasynadaǵy kezekshilik aýysymnyń qalaı júzege asatynyn óz kózimmen kórdim. Adamdar avtobýsqa otyrdy da, úıdi-úıine ketip qaldy. Oblystyq densaýlyq saqtaý basqarmasynan nege olardyń aldymen testileýden ótpeıtinin suradym. Sóıtsek, Kókshetaýdaǵy jeke menshik zerthanalarda da, memlekettik zerthanalarda da IFA ádisimen tekserý júrgizilmeıtin bolyp shyqty. Shyn máninde, osy 4-5 aı boıy olar bas sanıtarlyq dárigerdiń qaýlysyn buzdy. Sonda sizder (Densaýlyq saqtaý mınıstrligine qaratyp aıtyp otyr) olardyń qaısysy jumysqa basqa jerden aýrý juqtyryp kelgenin, qaısysy kezekshilik aýysymyn atqarý barysynda juqtyryp alǵanyn qalaı anyqtadyńyzdar? İndetti kimniń qaı jerden juqtyrǵanyn qalaı anyqtaýǵa bolady?»,- dedi Murat Temirjanov.

Partıalyqtar QR DSM janyndaǵy «Respýblıkalyq elektrondyq densaýlyq saqtaý ortalyǵy» SHJQ RMK qyzmetine jeke toqtaldy. Partbaqylaý komıtetiniń málimeti boıynsha, «Mapcovid» júıesin Eńbek mınıstrliginiń Aqparattyq júıesimen ıntegrasıalaný prosesine baılanysty qatelikter oryn alyp otyr. Júıe stasıonarda emdelmegen, biraq ambýlatorıalyq em qabyldaǵan medısına qyzmetkerleriniń qujattaryn qabyldamaıdy (júıe «Dıagnoz tabylmady» degen qate tabady).

«Bul nege burynyraq jasalyp qoımaǵan? Tehnıkalyq turǵydan bul sonshalyqty qıyn ba álde ony sheshý endi ǵana qolǵa alynyp jatyr ma? Qarapaıym nárse ǵoı. Excel-degi birneshe kesteni bir jerge jınaý kez kelgen stýdenttiń de qolynan keledi! Al munda osyny bútindeı bir SHJQ RMK atqara almaı otyr. Bul ne sonda qasarysý ma álde beıqamdyq pa?», - dedi Pavel Kazansev.

Otyrys sońynda partıalyq baqylaý komıteti densaýlyq saqtaý vıse-mınıstri Lúdmıla Búrabekovany jáne eńbek vıse-mınıstri Erbol Ospanovty sógis túrindegi partıalyq jaýapkershilikke tartýdy usyndy.

Eńbek mınıstrligi men Densaýlyq saqtaý mınıstrliginiń ókilderi bolsa, ótemaqy tóleý máselesi osy jyldyń 14 qyrkúıegine deıin sheshiletinine sendirdi.