Premer-mınıstrdiń birinshi orynbasary Álıhan Smaıylov prezıdent Qasym-Jomart Toqaevtyń joldaýynda aıtylǵan tapsyrmalardy júzege asyrý úshin shamamen 2 trln teńge qajettigin atap aıtty. Bul týraly ol úkimet otyrysynda ótken brıfıńte málimdedi.

– Joldaýda aıtylǵan Prezıdenttiń tapsyrmalary tıisti qarjylyq qoldaýdy qajet etedi. Joldaýda aıtylǵan birqatar tapsyrmany oryndaý úshin bıylǵy respýblıkalyq búdjette belgili bir soma qarastyrylyp qoıǵan. Máselen, jańa 13 ınfeksıalyq aýrýhananyń qurylysyna 30 mıllıard teńge kózdelgen. Úkimettiń rezervinen áleýmettik jaǵynan osal otbasylardyń balalaryna kompúterlik jabdyqtar satyp alýǵa qazirdiń ózinde 70 mıllıard teńge bólindi, – deıdi ol.

Onyń aıtýynsha, qazirgi ýaqytta 2020 jylǵy búdjetti naqtylaý aıasynda osy jyldyń shyǵyndaryn qosymsha qamtamasyz etý boıynsha jumys júrgizilip jatyr. Atap aıtqanda, medısına qyzmetkerlerine qosymsha aqy tóleý, dári-dármek satyp alý jáne t.b. Aldyn ala esepteý boıynsha bıyl qosymsha qajettilik 300 mıllıard teńgeni quraıdy.

– 2021 jyldyń búdjetinde prezıdenttiń joldaýda aıtqan tapsyrmalaryn oryndaýǵa 1,6 trıllıon teńge qarastyrylyp otyr. Bul qarjy birinshi kezekte, dárigerler men muǵalimderdiń jalaqysyn kóterýge, SHOB kredıtterin sýbsıdıalaýǵa, respýblıkalyq joldardy jóndeýge, "Aýyl – el besigi" baǵdarlamasyn iske asyrýǵa jumsalady. Jekelegen tapsyrmalar boıynsha memlekettik organdarmen birlesip qazir shyǵystar naqtylanýda. Joldaýdy oryndaýǵa qajet qarajat, negizinen, búdjettiń shyǵys bóligin ońtaılandyrý, kóleńkeli ekonomıkany azaıtý jumysynan túsetin túsimder, salyq salý bazasyn keńeıtý, jeke ınvestsıalar jáne kásipkerlikti damytý esebinen qamtamasyz etiledi, – dep atap ótti Álıhan Smaıylov.