Bilim jáne ǵylym mınıstri Asqat Aımaǵambetov jýrnalıs Nartaı Aralbaıulyna bergen suhbatynda nelikten birqatar ýnıversıtetterdiń lısenzıasyn qaıtaryp alyp jatqanyn túsindirdi. 

– Prezıdent osy bastamany aıtty, tapsyrma berdi. Bul prezıdenttiń sheshimi, endi biz bul tapsyrmany tıisti deńgeıde oryndaýymyz kerek. Árıne, bul ońaı sharýa emes. Qoǵamda barlyǵy túsinetin sıaqty. Biraq naqty bir ýnıversıtetke kelgende keshe ǵana túsinip júrgen adamdar "múmkin osy ýnıversıtetti jappaı-aq qoıamyz" deıdi. Erteń balań aýyryp, ony aýrýhanaǵa aparsań durys emes bilim alǵan maman otyrsa, kesiri kimge tıedi ? Eger de balańdy mektepke, balabaqshaǵa berseń, satyp alǵan dıplommen, oqymaǵan mamandar otyrsa, ol ózine tıedi ǵoı. Sony qalaı oılamaıdy dep tańqalamyn. Munyń bári memleketimizdiń áleýeti, ekonomıkasy damýy úshin óte mańyzdy sheshim. Sondyqtan bul ýnıversıetterge qansha jerden qıyn, jaǵymsyz bolsa da biz oryndaýymyz kerek. 

Biz eń birinshi Shymkenttegi ýnıversıtetti japtyq. Onda 35 myń stýdent oqıdy. Bizdiń ulttyq QazUÝ, ENÝ-da mundaı san joq. Bul ýnıversıettet jabylǵanda qanshama mlrd-tardan aıyrylǵanyn bilesizder. Qazir sotta 10-nan astam ýnıversıtetti jabý boıynsha ótinishter jatyr. Maǵan kóbisi aıtady: "Ýnıversıetterdi jabý abyroı beretin jumys emes, muny qaıtesiń" dep. Biz bir dúnıeni túsinýimiz kerek. Bilim sapasy memleketimizdiń damýyna tikeleı baılanysty. Sondyqtan qandaı qıyn, abyroı bermeıtin jumys bolsa da muny isteý kerek. 

Qazir qoǵamnyń kózi ashyq. Qaı ýnıversıtet sapaly, sapasyz bilim berip jatqanyn biledi. Ýnıversıtetterdi japqanda aldyn-ala 3-4 aı buryn aqparat shyqty. Sol kezde birde-bir stýdent ketpeıdi. Stýdentter, ata-analar tarapynan qujattarymdy qaıtyp alaıyn degen qozǵalys joq. Bul ýnıversıetke barǵanda stýdentter bilim alamyn dep emes, qaǵaz alamyn dep barady. Bul óte qıyn másele. 2021 jyldan bastap jańa norma enetin bolady. Bıylǵy jyldan bastap memlekettik dıplom bolmaıdy. Ár ýnıversıtet óziniń dıplomyn beredi. 

Azamattarymyz túsinýi kerek. Dıplom, qaǵaz – eshkimge kerek emes, keregi – bilim. Bilim úshin baratyn bolsa, basqasha bolady. Biz keıbir ýnıversıtetterdi shańsorǵysh deımiz. Óıtkeni sapaly bilim beretin ýnıversıtetter oqýdan shyǵaryp tastaıdy. Al, shańsorǵysh ýnıversıtetter onyń bárin terip alyp, naryqtan oqı almaı shyǵyp ketken balalardyń bárin jınap alyp óziniń dıplomyn beredi. Olar boıynsha biz tıisti sheshim qabyldap, nazarda ustaýdamyz, – dedi mınıstr Asqat Aımaǵambetov.