Depýtat Baqytjan Bazarbek mınıstrlikter men memlekettik apparatty qysqartýdy usyndy
Májilis depýtaty Baqytjan Bazarbek memlekettik basqarý júıesine jasandy ıntellektini engizýdi jáne memlekettik shyǵyndardy ońtaılandyrý maqsatynda mınıstrlikterdi qysqartýdy usyndy. Bul týraly ol Májilis kýlýarynda málimdedi.
— Memlekettik qyzmetti sıfrlandyrý aıasynda biz 2026 jyldan bastap memlekettik apparatty kezeń-kezeńimen qysqartýǵa kóshýimiz kerek. Biraq bul qadamnan úkimet te, basqa qurylymdar da qorqady. Eger 2026 jyldan bastap shyǵyndardy azaıtpasaq, memleketimiz qaryz qysymynda qalýy múmkin, — dedi depýtat.
Onyń aıtýynsha, memlekettik qaryzdy azaıtý úshin keıbir ulttyq kompanıalar men mınıstrlikterdiń qurylymdaryn ońtaılandyrý qajet.
— «Samuryq-Qazyna», «Báıterek» sıaqty ulttyq kompanıalardyń ákimshilik apparatyn qysqartý kerek. Sondaı-aq, keıbir mınıstrlikterdi biriktirý usynylady. Mysaly, Sý resýrstary jáne ekologıa mınıstrligin, Qarjy jáne Ulttyq ekonomıka mınıstrligin, Indýstrıa jáne Ónerkásip-qurylys mınıstrligin qosýǵa bolady. Ár mınıstrlikte keminde 5-6 vıse-mınıstr bar. Olardyń sanyn ekige deıin qysqartýǵa bolady. Bul memlekettik shyǵyndardy azaıtýǵa yqpal etedi, — dep atap ótti Bazarbek.
Depýtattyń pikirinshe, jasandy ıntellektini memlekettik organdar jumysyna engizý arqyly da úderisti jedeldetýge jáne tıimdilikke qol jetkizýge bolady.
