Almaty oblysynda jazǵy shomylý maýsymynyń bastalýyna baılanysty sý aıdyndarynyń qaýipsizdigi men jaǵajaılardyń sanıtarıalyq jaǵdaıy erekshe baqylaýǵa alyndy. Bul týraly Almaty oblysynyń Óńirlik komýnıkasıalar qyzmetiniń aqparattyq alańynda ótken baspasóz máslıhatynda oblystyq sanıtarıalyq-epıdemıologıalyq baqylaý departamentiniń basshysy Ismaılov Marat málimdedi.

Dúnıejúzilik densaýlyq saqtaý uıymynyń derekterine sáıkes, álemdegi aýrýlardyń 80% sapasyz sýmen baılanysty. Sondyqtan sý obektileriniń sanıtarıalyq jaǵdaıy – halyq densaýlyǵy úshin asa mańyzdy másele.

Almaty oblysynda 130 demalys orny baqylaýǵa alynǵan. Onyń ishinde 90 Qonaev qalasynda, Eńbekshiqazaq, Balqash jáne İle aýdandarynda ornalasqan. Sonymen qatar, 33 qala syrtyndaǵy oqýshylar lageri de sanıtarıalyq tekserýden ótýde.

Departament jyl saıyn maýsym bastalar aldynda sý men jaǵajaı qumyn zerthanalyq tekserýden ótkizedi. Bıylǵy maýsymǵa daıyndyq aıasynda 147 sý 51 topyraq synamasy alynǵan.

Shomylýǵa arnalǵan sý aıdyndaryn paıdalanatyn kásipkerler QR Densaýlyq saqtaý mınıstrliginiń sanıtarıalyq erejelerine sáıkes sanıtarlyq-epıdemıologıalyq qorytyndy alýǵa mindetti. Jaǵajaı aýmaǵynda kóleńke túsiretin shatyrlar, shezlońtar, kabınalar, tazalyqqa arnalǵan quraldar ornatylyp, kún saıyn dezınfeksıa men tazalaý jumystary júrgizilýi tıis.

Ismaılov Marat jaǵajaıdy tańdaý kezinde birneshe qarapaıym erejeni saqtaýǵa shaqyrdy. Atap aıtqanda, demalys orny las aǵyndy sýlardan, mal jaıylymynan jáne óndiris oryndarynan keminde 500 metr qashyqtyqta ornalasýy tıis. Balalardyń shomylýyna tek aýa temperatýrasy +23°C jáne sý temperatýrasy +20°C bolǵanda ǵana ruqsat beriledi.

Bizdiń maqsatymyz – halyqtyń qaýipsiz demalysyn qamtamasyz etý. Sondyqtan árbir demalys ornynyń sanıtarıalyq jaǵdaıy qatań baqylaýda bolady, — dep qorytyndylady sózin Ismaılov Marat.