İshki ister mınıstrliginiń Almaty qalalyq akademıasynda ózine qol jumsaǵan 19 jastaǵy Salamat Ótegenovtyń anasy Bekzat Imanǵalıeva ulynyń ólimi týraly baspasóz betinde aıtqannan keıin ózine basqa akademıada oqıtyn kýrsanttaryń ata-analary habarlasa bastaǵanyn jetkizdi. Qara jamylǵan áıeldiń aıtýynsha, hat almasyp jatqan ata-analar oqý ornyndaǵy qysym týraly sóz qozǵaǵan, dep habarlady

"Ýralskaıa nedelá"  basylymy.

– Meniń ulym týraly maqala jarıalanǵannan keıin maǵan İİM akademıasyndaǵy kýrsanttardyń taǵy eki ata-anasy what'sApp-qa jazdy. Olar balalarynyń qaı akademıada oqıtynyn aıtpady, biraq jazǵandardyń biri balasynyń qysym saldarynan İİM akademıasynan shyǵyp ketkenin jetkizdi. Ekinshiden, onyń balasy oqyp jatqan akademıada da kýrsanttardan qarajat jınaý faktileri bolǵanyn aıtty, – dedi ol.

Bekzat Imanǵalıevaǵa jazǵan ata-analar aty-jónin atamaýdy surap, jýrnalısermen sóılesýge kelisim bermegen.

Esterińizge sala keteıik, 13 jeltoqsanda İİM Almaty akademıasynyń kýrsanty 19 jastaǵy Salamat Ótegenov asqananyń qosalqy bólmesinde asylyp qalǵan. Marqumnyń týystary jigittiń İİM Almaty akademıasynda oqýynyń tolyq tarıhyn aıtyp, mekeme qabyrǵasynda únemi aqsha jınaý derekteri bolǵanyn málimdedi. Salamat qaıtys bolǵanǵa deıin úlken aǵasynan aqsha suraǵan. 

Maqala jarıalanǵannan keıin kelesi kúni İİM Almaty akademıasynyń bastyǵy Ómirbaı Smaıylov qyzmetinen bosatyldy. Onymen birge atqaryp otyrǵan qyzmetterinen taǵy 6 qyzmetker bosatyldy, al oqý ornyna tekserýmen mınıstrliktiń ishki aýdıt, kadr saıasaty jáne ózindik qaýipsizdik departamentteriniń qyzmetkerleri jiberildi. Kelesi jyldyń basynan bastap İİM-niń barlyq oqý oryndarynda osyndaı tekserý júrgizilmek.