"Iran men Qytaı arasynda jasalǵan jáne uzaq ýaqyt boıy talqylanǵan saýda, ınvestısıa jáne qorǵanys kelisimsharty Tegeranǵa tynystap alýǵa múmkindik beredi" dep habarlady The Independent basylymy.

Iran Amerıkanyń ıadrolyq kelisim týraly qysym jasaýyna qarsy ekenin ashyq bildirýde.

Al Beıjiń men Tegeran 25 jyldyq kelisimshartqa qol qoıyp, Vashıngtonǵa eskertý jiberdi.

– Mámile mańyzdy. Ýaqyt ta dál kezi. Iran óziniń shıelenisti jáne qıyn kezeńinde de seriktesteri bar ekenin bildirýge tyrysady. Sonymen qatar, bul Irannyń basqa elderdi qýyp jetýge tyrysýy. Degenmen, bul Iran men Qytaıdyń erekshe tereń jáne keń qarym-qatynasqa ıe ekendiginiń belgisi emes, – deıdi Londondaǵy sarapshy jáne ekonomıkalyq damý mamany Esfandıar Batmangelıdj.

Energıaǵa suranysy mol jáne koronavırýstyq pandemıadan ekonomıkalyq turǵydan qalpyna kelgen Qytaı AQSH-tyń sanksıalary Iranmen saýda-sattyqqa kedergi keltirgenine qaramastan, qazirdiń ózinde álemdegi kez kelgen elge qaraǵanda Iran munaıyn kóbirek ımporttaıdy.

Iran men Qytaı jaqynda Úndi muhıtynda Reseımen birlesken áskerı jattyǵýlar ótkizdi. Beıjiń men Tegeran barlaý máseleleri boıynsha birneshe jyldar boıy yntymaqtastyqta boldy. Keıbir aqparattar Tegeran Beıjińge amerıkalyq ushqyshsyz ushaqtar men adamdardyń tyńshylyq jelileri týraly qupıa aqparat berdi dep sanaıdy.

Iran men Qytaı arasyndaǵy strategıalyq yntymaqtastyq týraly kelisim Islam respýblıkasyn Beıjińniń "Bir beldeý, bir jol" bastamasyna qosty. Al, "Bir beldeý, bir jol" bastamasy – Álemdegi eń iri ekonomıka bolýǵa umtylǵan Beıjińniń ondaǵan memleketterge yqpaly men ınvestısıalaryn keńeıtýge baǵyttalǵan ǵalamdyq ınfraqurylymdyq joba.