Karantın sharalarynyń tıimdiligi saraptamadan ótip, qaýly qabyldarda kásipkerlerdiń pikirine qulaq túriledi. Bul týraly Almatynyń bas sanıtar dárigeri Jandarbek Bekshın onlaın baspasóz qyzmetinde málim etti.

– Eshteńege qaramastan biz qaýlyǵa ózgeris engizýge ázirmiz. Juma kúni engizilgen karantın sharalaryna baǵa beriledi. Eger qandaıda bir sharalar nátıje bermese, ony alyp tastap, karantındi jeńildetemiz. Nysandarǵa ǵana emes, qolǵa alynǵan sharalardy da udaıy baǵalaý júrip otyrady, – dedi ol.

Onyń sózinshe, bazarlar men saýda oıyn-saýyq ortalyqtary vaksına salatyn oryn bólýge nıet bildirgen. "Ashyq" qosymshasyna kirip úlgergender júıe boıynsha jumys isteı alady.

Sondaı-aq ol restorandarmen birlesip jazǵy alańy bar oryndardyń jumys isteý máselesi sheshilgenin atap ótti. Oǵan sáıkes, qoǵamdyq tamaqtaný oryndary jazǵy alańda qonaq qabyldaýyna ruhsat. Tek oryndardyń jartysy ǵana tolýǵa tıis ári ár ústeldiń araqashyqtyǵy 2 metr bolýy kerek.

Artynsha, Jandarbek Bekshınniń jańa qaýlysy jarıalandy. Ol boıynsha kafe-rastorandar jazǵy alańda kúndizgi 07.00-22.00 aralyǵynda qonaq qabyldaı alady.

Stýdentter qashyqtan oqıdy. Ata-analardyń ótinishi boıynsha 1-5-synyp, 9,11-synyp oqýshylary bala sanyn 15-ten asyrmaı kezekshi synypta oqýǵa, oqýshy sany 300-den aspaıtyn mektepter dástúrli oqytý formatyna ótýine ruhsat.