«Nur Otan» partıasynyń jańa ekologıalyq keńesiniń alǵashqy uıymdastyrý otyrysynda sý resýrstaryn tıimdi paıdalaný, orman qoryn ulǵaıtý, shóleıttený problemasyn sheshý jáne qorshaǵan ortany qorǵaý salasyndaǵy basqa da ózekti máseleler qaraldy.

«Partıanyń saılaýaldy ýádelerin oryndaý aıasynda 1 shildede jańa Ekologıalyq kodeks kúshine enedi. Endi qorshaǵan ortaǵa zıandy shyǵaryndylar úshin tólenetin barlyq aqshalaı túsimder tek tabıǵatty qorǵaý is-sharalaryna jumsalady. Sondaı-aq, Parlament «Janýarlardy qorǵaý týraly» zań jobasyn jáne polıgonnyń lastanǵan jerlerinde radıasıalyq qaýipsizdikti qamtamasyz etý úshin «Semeı ıadrolyq qaýipsizdik aımaǵy týraly» zań jobasyn qaraýdy josparlap otyr. Osy baǵytta belsendi jumys isteýimiz qajet», - dedi Keńes tóraǵasy jáne «Nur Otan» fraksıasynyń Májilis depýtaty Eldos Abaqanov.

Óz kezeginde Ekologıa, geologıa jáne tabıǵı resýrstar mınıstri Keshirińiz Maǵzum Myrzaǵalıev Aqmola oblysyndaǵy Qopa, Býrabaı jáne Shortandy, Aqtóbe oblysyndaǵy Shalqar kólderin tazartý, sondaı-aq Aral teńiziniń soltústik bóligin jáne Jaıyq ózeniniń sýaǵaryn qalpyna keltirý josparlary týraly aıtty.

«Nur Otan» partıasynyń saılaýaldy baǵdarlamasynda 2025 jylǵa deıin 716 myń gektardan astam jerge 2 mlrd aǵash otyrǵyzý mindeti tur. Búgingi tańda aǵymdaǵy jylǵa josparlanǵan 130,2 mln aǵashtyń 66,5 mln-ǵa jýyǵy otyrǵyzyldy. Shóleıttený problemasyn sheshý úshin 433,9 myń gektar jerge sekseýil otyrǵyzylady», - dedi ekologıa mınıstri.

Otyrys barysynda Keńes tóraǵasynyń orynbasary Edil Jańbyrshın óńirlerdegi naqty ekologıalyq problemalarǵa nazar aýdaryp, olardyń tizilimin qalyptastyrýdy usyndy.

«Máselen, sý resýrstaryn utymdy paıdalaný máselesi bar, ony óńirler boıynsha naqtylaý qajet. Jaqynda Aqtóbe oblysynda (Muǵaljar, Temir aýdandary) ekobelsendiler Oıyl ózeniniń saǵasynda 33 zańsyz salynǵan bóget, 3 toǵan jáne 2 kópirdi anyqtady. Mundaı jaǵdaılar basqa oblystarda da bolýy múmkin», - dedi Edil Jańbyrshın.

Otyrys qorytyndysy boıynsha salalyq mınıstrlikke keńespen birlesip óńirlerde ekologıalyq saıasatty júzege asyrýdyń ádistemesin ázirleý jáne ony iske asyrýdyń tıimdiligine baǵalaý júrgizý usynyldy. Partıalyqtardy, prokýratýra men polısıa ókilderin mindetti túrde qatystyra otyryp, halyqtyń qorshaǵan ortaǵa qatysty shaǵymdaryna den qoıý úshin mobıldi toptar qurý múmkindigin qarastyrý usynylady.

Baspasóz qyzmetiniń málimetinshe, partıanyń ekologıalyq saıasaty aıasynda qalalardyń aýasyn jaqsartý, sý resýrstaryn utymdy paıdalaný, qaldyqtardy qaıta óńdeý boıynsha jol kartalaryn júzege asyrý jalǵasady.

Máselen, aldaǵy 5 jylda Nur-Sultan, Almaty, Shymkent, Atyraý, Taraz jáne Aqtóbe qalalarynda qoqysty qaıta óńdeý úlesin 30%-ǵa deıin jetkize otyryp, 6 qoqys óńdeý zaýyty iske qosylady. 2025 jylǵa deıin Almaty qalasyndaǵy JEO-2-ni gazǵa kóshirý josparlanýda.

Partıanyń barlyq saılaýaldy ýádelerimen tolyǵyraq nurotan.kz. saıtynan tanysýǵa bolady.