Bilim jáne ǵylym mınıstri Asqat Aımaǵambetov joǵary oqý oryndarynyń rektorlarymen keńes ótkizdi. Kezdesý barysynda biri stýdentter men oqytýshylardyń qaýipsizdik máseleleri qaraldy, dep habarlady mınıstrliktiń baspasóz qyzmeti.

Mınıstr bilim ordalaryndaǵy qural-jabdyqtarǵa túgendeý júrgizý, beınekameralardyń jedel basqarý ortalyqtaryna qosylýyn qamtamasyz etý, joǵary oqý oryndaryna kirgizý rejımin kúsheıtýdi jáne stýdentter arasynda oqý-jattyǵý sabaqtaryn ótkizýdi tapsyrdy. Sondaı-aq jataqhanalarda pysyqtalýy tıis qaýipsizdikti kúsheıtý sharalary da aıtyldy.

– Qazandaǵy qaıǵyly jaǵdaı mektepter men kolejderdegi qaýipsizdikti kúsheıtý qajettigin kórsetti. Osyndaı qorqynyshty jaǵdaılardyń qaıtalanýyna jol bermeý úshin mekteptermen qosa, ýnıversıtetterde de qaýipsizdik sharalaryn kúsheıtýimiz kerek. Stýdentter men oqytýshylar tótenshe jaǵdaılarda ózin qalaı ustaý kerektigin bilýi tıis. Biz qolda bar jabdyqtardy tekserip, qajet bolǵan jaǵdaıda qosymsha jabdyq ornatýymyz kerek. Qaýipsizdik sharalary qoldanylyp, oqý jattyǵýlary neǵurlym jıi ótkiziletin bolsa, bizdiń balalarymyzdyń da qaýipsizdigi soǵurlym arta túsedi, – dep atap ótti mınıstr Asqat Aımaǵambetov

Jýyrda Tatarstan astanasy Qazan qalasyndaǵy mektepke 19 jastaǵy jasóspirim qarýmen shabýyl jasap, sonyń saldarynan eki muǵalim, jeti oqýshy qaza taýyp, 21 adam jaraqat alǵan. Osy oqıǵadan keıin bilim ordalaryndaǵy qaýipsizdik máselesine basa mán berile bastady.