Ózbekstanda saqal ósirgender men hıdjab kıgenderge qarsy naýqan qaıta kúsh aldy, dep habarlaıdy Ortalyq Azıanyń jańalyqtar qyzmeti.

"Ozodlık" radıosyna jibergen vıdeolarǵa qaraǵanda, Ándijan qalasyndaǵy Bank kolejinde oqıtyn hıdjab kıetin stýdentterden onyń ornyna oramal taǵýdy talap etip jatqanyn kórýge bolady.

Bank kolejiniń stýdentteri "Ozodlık" radıosyna vıdeo jiberip, bul qanshalyqty zańdy ekenin túsindirip berińizder dep ótinish aıtqan.

Ózbekstannyń Ar-ujdan erkindigi jáne dinı uıymdar týraly" zańnyń jańa redaksıasyndaǵy 14-babynda "Dinı mekemelerde jumys isteıtinderdi qospaǵanda, Ózbekstan azamattaryna qoǵamdyq oryndarda "kúltti nasıhattaıtyn" kıim kıýge tyıym salynady" dep jazylǵan.

Buhara qalasyndaǵy Injener-tehnologıa ınstıtýtynyń stýdenti Fatıma Abdýlloh Ózbekstan prezıdentiniń qyzy Saıda Mırzıaevaǵa ashyq hat jazyp, oqý orny basshylary hıdjabty sheshýge májbúrlep jatqanyn jetkizgen.

Ótken aptada Ózbekstan musylmandary dinı basqarmasynyń basshysy, múftı Nýrıddın Holıknazarov ıslamda kıimge qatysty qatań tyıym joq ekenin aıtqan. Ol qyz-kelinshekterdi betterin búrkemeı, ashyq, salt-dástúrge saı kıinýge shaqyrǵan.

Ózbekstanda sonymen birge saqal ósirgenderge qarsy reıd júrip jatqany aıtylady áleýmettik jelilerde.