AQSH prezıdenti Donald Tramp pen Qytaı tóraǵasy Sı Szınpın sońǵy aılarda báseńsı bastaǵan ekijaqty qatynastardy qaıta jandandyrýǵa túrtki bolǵan keń aýqymdy telefon áńgimesin ótkizdi. Taraptar Taıvan, saýda, Ýkraınadaǵy soǵys jáne esirtki trafıgi sıaqty mańyzdy máselelerdi talqylady.
Telefondaǵy sóılesýden keıin Tramp AQSH pen Qytaı arasyndaǵy qarym-qatynasty «óte keremet» dep atap, eki kóshbasshy bir-birine shaqyrý jibergenin aıtty. Ol Sı Szınpınniń shaqyrýyn qabyldap, sáýir aıynda Qytaıǵa barýdy josparlap otyrǵanyn, al Qytaı basshysy jyldyń sońynda AQSH-qa keletinin málimdedi.
Tramp áńgime barysynda Ýkraınadaǵy soǵys, fentanıl saýdasy jáne amerıkalyq fermerler úshin jasalatyn kelisim jaıly sóıleskenin aıtty. «Biz endi úlken máselelerge nazar aýdara alamyz… Jıi baılanysta bolý mańyzdy ekenin ekeýmiz de túsinemiz», — dedi ol.
Qytaı Syrtqy ister mınıstrliginiń habarlaýynsha, Tramp Vashıngton Taıvan máselesiniń Qytaı úshin mańyzyn «jaqsy túsinetinin» atap ótken. AQSH Taıvandy táýelsiz memleket retinde resmı tanymasa da, onyń basty seriktesi ári qarý jetkizýshisi bolyp sanalady.
Sı Szınpın áńgime kezinde Taıvannyń Qytaıǵa qaıtarylýyn «soǵystan keıingi halyqaralyq tártiptiń ajyramas bóligi» dep sıpattady. Bul málimdeme Japonıa men Qytaı arasyndaǵy Taıvanǵa qatysty shıelenis kúsheıgen kezde jasaldy. Japonıa premer-mınıstri Sanae Takaıchı kez kelgen shabýyl jaǵdaıynda Japonıa Taıvandy áskerı qoldaýy múmkin ekenin aıtqan.
Áńgime AQSH-tyń Ýkraınadaǵy soǵysty toqtatýǵa baǵyttalǵan jańa dıplomatıalyq bastamasymen de tuspa-tus keldi. Qytaı bul qaqtyǵysta ózin beıtarap tarap retinde ustap otyr. Sı Szınpın barlyq bitimge bastaıtyn áreketterdi qoldaıtynyn jáne daǵdarystyń túpkilikti sheshilýin qalaıtynyn málimdedi.
Telefon qońyraýy eki kóshbasshynyń ótken aıda Ońtústik Koreıanyń Pýsan qalasynda kezdeskeninen keıin boldy. Sol kezdegi ýaqytsha kelisimge sáıkes, Qytaı mańyzdy mıneraldar eksportyna shekteýlerdi bir jylǵa toqtatyp, AQSH keıbir qytaılyq taýarlarǵa salynǵan tarıfterdi azaıtýǵa kelisken. Sonymen qatar, Qytaı birneshe aı boıy satyp alýdan bas tartqan amerıkalyq soıa burshaǵyn qaıta ımporttaýǵa ýaǵdalasqan.
Tramp dúısenbi kúni Sımen «fentanıl, soıa jáne basqa da aýylsharýashylyq ónimderi» jóninde sóıleskenin jazdy. «Biz fermerlerimiz úshin óte mańyzdy kelisim jasadyq — ári ol aldaǵy ýaqytta odan saıyn jaqsara túsedi», — dedi AQSH prezıdenti, biraq naqty egjeı-tegjeıin jarıalamady.
