Buǵan deıin fılmniń teleserıal nusqasy kórermenge jol tartqan bolatyn. Telehıkaıada Alash qaıratkeri Mirjaqyp Dýlatuly ómiriniń 1909-1935 jyldardaǵy kezeńi qamtylady. Mirjaqyptyń «Oıan, qazaq!» kitabynyń jaryqqa shyǵýy, «Baqytsyz Jamal» romanynyń jazylýy, revolúsıadan keıingi jyldardaǵy, asharshylyq kezindegi qoǵamdyq-saıası qyzmeti, Qyzylorda, Semeı, Máskeýdiń áıgili «Býtyrka» abaqtysyndaǵy jyldary jáne jan jary Ǵaınıjamalmen mahabbat hıkaıasy serıalda kezek baıandalǵan.

Kıno nusqasyna sol oqıǵa jelilerin syǵymdap, birtutas etip beredi. Qoıýshy-rejısser Murat Esjannyń kórkemdik sheshimderi, ashtyq jyldaryndaǵy halyqtyń basyna túsken náýbetti, Mirjaqyp Dýlatulynyń azattyq jolyndaǵy jan keshti kúresin kishkentaı ǵana detaldardy oınatý arqyly da ádemi berilgen.

Rejıser Murat Esjan naryqtaǵy kınolarǵa qatysty pikir bildirdi.  

– Osy tájirıbede baıqaǵanymyz naryq kóp nárseni sheshedi. Komedıa sıaqty jeńil formattaǵy kınolardyń jarnamasy jaqsy, kórermeni kóp, soǵan qaraı tabysy da joǵary bolady eken. Sol úshin bundaı janrdaǵy fılmder túsirile beredi, túsirile beredi. Al endi tarıhı, salmaqty dúnıelerge jarnama azdyǵynan kóziqaraqty kórermen kelmeı qalady da ekrandaǵy ǵumyry qysqa bolady eken. Bizdiń elde tarıhı kınolardyń az túsirilý sebebi osy. Bundaı dúnıelerdi kórmeıdi, túsinýge kópshiliktiń deńgeıi jetpeıdi degen tujyrym qalyptasady. Qarlyǵashtyń qanatymen sý sepkendeı osy senimdi buzsaq, – dep kórermenniń mol jınalyp, ult janashyrlary jaıynda fılmdi kórse, rýhy bıiktese degen izgi qalaýyn jetkizdi.  

Kórermenniń kóptiginen zalda ıne shanshar oryn bolmady. Tusaýkeserge kelgen zıaly qaýym ókilderi joǵary baǵalap, rejıserlyq jumysty, basty róldi somdaǵan Baqyt Qajybaevtyń sheberligin tus-tustan maqtap jatty. Óner súıer qaýymdy uly tulǵa jaıynda túsirilgen tolyqmetrajdy fılmdi kórýge shaqyramyz!

Kinopark jelisi dál qazirgi ýaqytta Almaty, Astana, Qaraǵandy, Qyzylorda, Aqtaý, Atyraý, Oral, Aqtóbe, Shymkent, Túrkistan, Jańaózen qalalarynda bar. Búginnen bastap fılm Semeı, Óskemen, Taldyqorǵan, Jezqazǵan, Petropavl, Pavlodar qalalaryndaǵy jekemenshik kınoteatrlarǵa qoıylady.

«Chaplin» kınoteatrlar jelisi kestesiniń tyǵyzdyǵyna baılanysty fılm bul kınojelilerde kórsetilmeıdi.