Shyraqshylar, ıtter múrdelerdi jep ketpes úshin kúndiz-túni kúzetip júrgenderin aıtady. Buralqy ıtter tipti adamdarǵa da shabýyldaı bastaǵan kórinedi. Jyl basynan beri ıt qaýyp, aýrýhanaǵa túskender sany 1700-ge jýyqtaǵan. 

Shymkentte qańǵybas ıtter mola aralap, qabirlerdi qazyp júr. Yntymaq shaǵynaýdanynyń turǵyndary osylaı dep dabyl qaǵýda. Sózderinshe, ıtter tańerteńnen kesh batqanǵa deıin tynbaı qabir arshıdy. Mazarat shyraqshylary qańǵybas tórt aıaqtylardyń qazǵan jerin kómip álekpiz deıdi. Al beıitterdiń basynda ıtterdiń taban izderi men nájisteri jatqan kórinedi.

Shýhratbek Israılov, shyraqshy: «Itterden  sharshadyq, kúnige qazyp jatyr, qanshasyn qýyp jatyrmyz. Aryz berdik, ne bolmaı jatyr. İsh jaǵyna deıin qazyp jatyr. Jaqynda bul máıitterdi syrtqa shyǵaryp, jeı me bilmeımin. Mine qazyp-qazyp, arttarynan kómip shyǵyp jatyrmyz. It atatyndar ata almaıdy ony, oǵy 3 metrge ǵana jetedi oǵy.»

Turǵyndardyń sózinshe dánikken ıtter endi kóshedegi adamdarǵa da shabýyl jasaı bastaǵan. Ásirese mektep oqýshylary zardap shegip otyr eken. Turǵyndar jaqynda ǵana ıt talaǵan balany áreń alyp qalǵanyn aıtady.

Shymkentte ıt aýlaýmen aınalysatyn 6 brıgada bar eken. Olar byltyr 40 myń qańǵybas ıt-mysyq aýlasa, bıyl bar bolǵany 16 myń 800 buralqyny ustapty. Jaýapty basshylar ıt-mysyqtardy jappaı joıýǵa zań múmkindik bermeıdi dep otyr.

Degenmen, jaýaptylardyń jumysyna turǵyndardyń kóńili tolmaı otyr. Sebebi kóshelerde qańǵybas ıtter azaıar emes. Aıta keteıik, jabaıy janýarlardy aýlap, kastrasıa jasap, búdjetten joıýǵa 264 mıllıon teńge bólingen.