Pákistanda parlamenttik saılaý ótti. Onyń resmı nátıjesi eki aptadan keıin jarıalanady. Al aldyn ala jarıalanǵan nátıjeler elde narazylyqtyń burq etýine túrtki boldy. Polısıa sherýge shyqqandardy basý úshin kózden jas aǵyzatyn gaz qoldanǵany da habarlanady.

The Guardian basylymy: «Pákistannyń búkil óńirinde parlamenttik saılaý nátıjeleri burmalandy degen uranmen jappaı sherý ótip jatyr. İsti bolǵan eks-premer Imran Hannyń jaqtastary kóshege shyǵyp, óz kandıdattaryna berilgen daýystardy sanaý kezinde zańsyzdyq oryn alǵanyn málimdedi» dep jazady.

Jeksenbide partıa búkil el boıynsha saılaý komısıasy fılıaldary aldynda jappaı narazylyq aksıalaryn uıymdastyrdy. Pákistan astanasy Lahordada polısıa keıbir narazylyq bildirýshilerdiń qolyn qaıyryp, abaqtyǵa qamady. Ravalpındı qalasynda sherýge shyqqandar men polıseıler arasynda qaqtyǵys boldy. Polısıa kózden jas aǵyzatyn gazdy qoldandy. Narazylyq aksıasyna eldiń ońtústigindegi Karachı qalasy, sondaı-aq Belýjıstan, Sınd jáne Haıber-Pahtýnhva syndy aımaqtar da qosyldy.

Jappaı narazylyq aksıalaryn uıymdastyrǵan Tehrık-e-Insaf partıasy Pákistannyń burynǵy premer-mınıstri Imran Hanmen baılanysty. Ol memlekettik syılyqtardy zańsyz satty degen aıyppen sottalǵan. Qańtar aıynyń sońynda oǵan basqa is boıynsha taǵy eki sot úkimi shyqty.