Joǵarǵy sot tisti durys julmaǵannyń saldarynan bala múgedek bolyp qalǵan jaǵdaıǵa baılanysty málimdeme taratyp, sot stomatologıalyq emhanadan moraldyq shyǵyn men materıaldyq shyǵyn úshin 1,5 mıllıon teńgeden astam ótemaqy óndirgenin habarlady.

Joǵarǵy sot málimdemesinde oqıǵa tómendegideı baıandalady.

Qyzylorda qalasynyń turǵyny balasynyń tisi aýrýyna baılanysty ortalyq qalalyq emhananyń balalar stomatologıasyna baryp, tis dárigeri balany emdep, tisin julyp tastaǵan. Emdeýden keıingi kelesi kúni balanyń jaq súıegi isinip, densaýlyǵy nasharlaǵan. Keıin balaǵa oblystyq kópsalaly aýrýhananyń jaq-bet bólimshesinde «Sol jaq tómengi jaqtyń jedel irińdi odontogendi flegmonasy, 7,5 tisin julǵandaǵy jaǵdaıy» dıagnozymen eki ret ota jasalǵan.

Arada alty aı ótkende balanyń jaq súıegi qaıta isip, irińdi jarasy jazylmaǵandyqtan, olar Almaty qalasynda aqyly negizde hırýrgıalyq aralasý arqyly aýrýhanada emdelýge májbúr bolǵan.

Medısınalyq jáne farmasevtıkalyq baqylaý departamenti júrgizgen tekseris qorytyndysyna sáıkes, emhana tis dárigeri kámeletke tolmaǵan balaǵa medısınalyq kómek kórsetý kezinde klınıkalyq dıagnostıka jáne emdeý hattamalaryn saqtamaǵan.

Onyń tisin orta medısınalyq bilimi bar stomatolog alyp tastaǵan, emdeý aldynda jaq súıeginiń rentgenografıasy obektıvti tekserilmeı, asqynýlar - tómengi jaqtyń qabyný prosesi bolǵan.

Balanyń anasy stomatologıalyq emhanadan ózine keltirilgen moraldyq jáne materıaldyq shyǵyndy óteýdi surap, sotqa júgingen.

Ol emhana medısına qyzmetkeriniń salǵyrttyǵy men alǵashqy medısınalyq kómekti durys kórsetpeýinen aýrý asqynyp, bala 2 jylǵa jýyq uıyqtaı almaı, dárigerlerdiń qorytyndysy boıynsha múgedek bolyp qalǵanyn kórsetken.

Sondaı-aq aqyly negizde úsh operasıa jasaýǵa, tisti emdeýge jáne dárigerlerden keńes alýǵa májbúr bolǵan.

Sot stomatologıalyq emhanadan moraldyq shyǵyn men materıaldyq shyǵyn úshin 1,5 mıllıon teńgeden astam ótemaqy óndirip bergen.