Premer-Mınıstr Oljas Bektenov Májilis depýtattarynyń Qazaqstannyń tórtinshi ǵaryshkerin ǵaryshqa ushyrýǵa qatysty saýalyna jaýap berdi.

Ol halyqaralyq ǵarysh baǵdarlamalaryna qazaqstandyq ǵaryshkerlerdiń qatysýy ulttyq jáne halyqaralyq deńgeıde negizdelgen jaǵdaıda ǵana iske asyrylatynyn atap ótti. «Basqarylatyn ǵarysh baǵdarlamalary edáýir qarjylyq shyǵyndy qajet etedi. Bul tek ushýǵa ǵana emes, ǵaryshkerdi daıarlaý, ǵylymı baǵdarlamalar ázirleý, logıstıka men ushýdan keıingi qyzmet kórsetýge de baılanysty», – dedi Úkimet basshysy.

Sondaı-aq, Bektenov tórtinshi ǵaryshkerdi ushyrý máselesine barynsha salmaqty ári pragmatıkalyq tásil qajet ekenin aıtty. Onyń aıtýynsha, joba ózektiligi men negizdiligi dáleldengen jaǵdaıda, tıisti sharalar halyqaralyq mindettemeler men eldiń qarjylyq-ekonomıkalyq múmkindikterin eskere otyryp júzege asyrylady.

Aıta keteıik, buǵan deıin Memleket basshysy Qasym-Jomart Toqaev «Baıqońyr» ǵarysh aılaǵynyń 70 jyldyǵyna arnalǵan vıdeo úndeý joldaǵan bolatyn. Sonymen qatar, qazirgi ýaqytta «Baıqońyr» kesheninde týrızmdi damytý tujyrymdamasy ázirlenip jatyr.