Májilis depýtaty Jubanov — 15 mlrd teńgelik tenderlerge ıelik etken kompanıanyń jalǵyz ıesi, - dep habarlaıdy Qamshy.kz Kýrsıvke silteme jasap.

Amanat partıasynan saılanǵan májilis depýtaty Ádil Jubanov Atyraýda 140-qa jýyq memlekettik satyp alýdy utyp alǵan "BatysAlánsStroı" JSHS-nyń jalǵyz quryltaıshysy retinde tirkelgen. Bul kompanıamen 2016 jyldan beri jalpy 15,2 mlrd teńgege kelisimshart jasalǵan. Qazirgi tańda kompanıany Jańabaı Jubanov basqarady – depýtatpen tegi men ákesiniń aty sáıkes.

Zańger Álisher Qadyrbekovtiń aıtýynsha, depýtat kompanıa ıesi bola alady, biraq ony tikeleı basqarýǵa, sheshim qabyldaýǵa jáne paıda kórýge quqyǵy joq. Eger bul talap buzylsa, Ortalyq saılaý komısıasy depýtattyq mandatty toqtatýǵa quqyly.

Qadyrbekov atap ótkendeı, bıznes senimgerlik basqarýǵa tapsyrylýy kerek, al depýtat memlekettik mártebesin jeke paıdasyna paıdalanbaýǵa mindetti. Alaıda, zań júzinde shekteý bolǵanymen, yqpal etýdiń janama tetikteri saqtalyp otyr – mysaly, salalyq komıtetterge qatysý nemese depýtattyq saýaldar arqyly.