Almaty oblysynda Qazaqstan Respýblıkasynyń jańa Konstıtýsıasynyń resmı túrde kúshine enýine oraı «Ata Zań – Qýatty Qazaqstan!» atty konferensıa ótti. Konferensıaǵa oblys ákimi Marat Sultanǵazıev tóraǵalyq etip, máslıhat depýtattary, qoǵamdyq keńes músheleri, zıaly qaýym ókilderi, quqyq qorǵaý organdarynyń qyzmetkerleri, kásipkerler, úkimettik emes uıymdar men etnomádenı birlestikterdiń músheleri jáne jastar qatysty. Olar engizilgen jańashyldyqtardyń mańyzy, qoǵamnyń damýyna tıgizetin róli men yqpaly týraly pikir almasty, – dep habarlaıdy Almaty oblysy ákiminiń baspasóz qyzmeti.
Marat Eleýsizuly jıynǵa jınalǵandardy jańa Konstıtýsıanyń zańdy kúshine enýimen quttyqtap, jańa Ata Zań elimizdegi saıası jáne memlekettik basqarý júıesin túbegeıli jańǵyrtqanyn aıtty.
«Jańa Konstıtýsıa azamattardyń memlekettik basqarýdaǵy rólin kúsheıtip, memlekettik ınstıtýttardyń jaýapkershiligin arttyrýǵa, adam quqyqtaryn qorǵaýdy nyǵaıtýǵa baǵyttalǵan. Prezıdent atap ótkendeı, «Zań men Tártip – memleket saıasatynyń ǵana emes, ult bolmysynyń ajyramas bóligi bolýy tıis». Sondaı-aq Memleket basshysynyń «Tazalyq uǵymy ultymyzdyń bolmys-bitimine tán asyl qasıetke, qoǵamdyq máni zor qundylyqqa aınalyp jatyr. «Taza Qazaqstan» tujyrymdamasy – sonyń aıqyn kórinisi» degen sózin negizge ala otyryp oblysymyzdyń barsha turǵyndaryn «Taza Qazaqstan» aksıasyna belsendi atsalysýǵa shaqyramyn. Bul oı-sananyń tazalyǵymen keletin dúnıe. Búgingi kúnge deıin oblysymyzda 104 myńǵa jýyq aǵash otyrǵyzyldy jáne 440 myń adam belsendilik tanytyp, jobanyń janashyryna aınaldy», – dedi aımaq basshysy.
Sondaı-aq Jańartylǵan Konstıtýsıada bilim berý men ǵylym memlekettiń strategıalyq basymdyǵy retinde aıqyndalǵanyn, tegin orta bilim alýǵa beriletin kepildikter kúsheıtilip, alǵash ret konstıtýsıalyq deńgeıde bekitilgenin jetkizdi. Oblys ákiminiń aıtýynsha, bıyl óńirde bilim berý salasyna 409,8 mlrd teńge bólingen. Oblysta 1 748 bilim berý uıymy jumys isteıdi, onda 470 myńnan astam bala bilim alyp, tárbıelenýde. Sońǵy úsh jylda oblysta 69 mektep boı kóterdi. 2025-2027 jyldary 91 mektepke kúrdeli jóndeý júrgizý josparlanǵan. Bıyl 11 nysanda jóndeý jumystary jalǵasyp, 2026-2028 jyldary 11 jańa mektep salý josparlanǵan.
«Jańa Konstıtýsıanyń qaǵıdattary adamdardyń kúndelikti ómirindegi naqty ózgerister arqyly kórinis tabýy qajettigin atap ótkim keledi. Bul árbir memlekettik qyzmetshiden joǵary jaýapkershilikti talap etedi. Formalızmge, búrokratıaǵa jáne azamattardyń máselelerine nemquraıly qaraýǵa jol joq. Árbir basshy óz salasynda ózgeristerdiń bastamashysy bolyp, qabyldanǵan sheshimderdiń naqty nátıjesine jaýap berýi tıis», – dedi Marat Eleýsizuly. Sondaı-aq elimizdegi buryn-sońdy bolmaǵan, eń úlken, eń aýqymdy joba – «Alataý sıtı» shahary Almaty oblysy aýmaǵynda boı kóterip kele jatqanyn aıtyp, jobanyń sátti júzege asýyna jan-jaqty kirisý kerektigin jetkizdi.
Oblystyq Qoǵamdyq keńestiń tóraǵasy Qazybek Dáýtálıev jańa Konstıtýsıanyń memlekettik basqarý júıesin jańǵyrtyp, zań ústemdigin nyǵaıtýǵa jáne azamattardyń memleket isine qatysý múmkindigin keńeıtýge jol ashqanyn tilge tıek etti. Onyń aıtýynsha, Prezıdent bastamasymen júzege asyrylyp jatqan «Halyq únine qulaq asatyn memleket» tujyrymdamasy aıasynda qoǵamdyq keńester men Halyq keńesiniń róli artyp keledi. Bul ınstıtýttar memlekettik organdar men azamattyq qoǵam arasyndaǵy tıimdi dıalog ornatyp, turǵyndardyń usynystary men pikirlerin sheshim qabyldaý prosesine engizýge, qoǵamdyq baqylaýdy kúsheıtýge yqpal etýde.
Konferensıada kásipkerler qaýymy atynan sóz sóılegen «Dáýlet-Beket» sharýa qojalyǵynyń basshysy Sydyq Daýletov eldegi ekonomıkalyq reformalar óndiristi damytýǵa, ınvestısıa tartýǵa jáne jańa jumys oryndaryn ashýǵa baǵyttalǵanyn aıtty.
Almaty oblysynyń belsendi jasy Alına Kan jańa Konstıtýsıanyń zańdy kúshine enýi Qazaqstannyń jańa damý kezeńiniń bastalǵanyn bildiretin tarıhı oqıǵa ekenine toqtaldy.
«Jańa Ata Zańda zań ústemdigi, ádilettilik, qoǵamdyq kelisim, adam quqyqtary men bostandyqtaryn qorǵaý, azamattardyń teń múmkindikteri men bolashaq urpaq aldyndaǵy jaýapkershilik sıaqty irgeli qundylyqtar bekitilgen. Bul qaǵıdattar árbir azamattyń, ásirese jastardyń ómirlik ustanymyna aınalýǵa tıis», – dedi Alına Kan.
Konferensıa sońynda birqatar azamatqa Memleket basshysynyń atynan Jańa Konstıtýsıanyń arnaıy basylymy saltanatty túrde tabystaldy. Sondaı-aq sıasy keppegen 2200 dana Ata Zań oblys aýmaǵyndaǵy barlyq memlekettik mekemeler men kitaphanalarǵa taratyldy.
