AMANAT OSK-ǵa resmı ótinish joldady – partıa Quryltaı saılaýyna qatyspaıdy
 
AMANAT Quryltaı saılaýyna qatyspaıdy – partıa OSK-ǵa resmı hat joldady
 
Bul týraly Qazaqstan Respýblıkasy Ortalyq saılaý komısıasynyń otyrysynda belgili boldy.

OSK-de aldaǵy Quryltaı saılaýyna qatysty máseleler boıynsha otyrys ótti. Onda Qazaqstan Respýblıkasy Ádilet vıse-mınıstri Botagóz Jaqselekova sóılep, júrgizilip jatqan saıası reformalardyń nátıjesinde saıası partıalar týraly zańnamanyń kezeń-kezeńimen jetildirilgenin jáne kóppartıalylyqtyń odan ári damýyna jol ashylǵanyn aıtty. Onyń sózinshe, 2022 jyly partıalardy tirkeý shegi 5 myń múshege deıin tómendetilip, partıa qurý talaptary aıtarlyqtaı jeńildetilgen.

«Sońǵy jyldardaǵy tájirıbe júrgizilgen zańnamalyq reformalardyń tıimdiligin rastap otyr. Tirkeý shegi tómendetilgennen keıin 3 jańa saıası partıa tirkeldi. Bul azamattardyń birlesý jónindegi konstıtýsıalyq quqyǵyn iske asyrý múmkindikteriniń keńeıgenin kórsetedi», – dedi ol.

Sondaı-aq vıse-mınıstr qazirgi ýaqytta Qazaqstanda segiz saıası partıa tirkelgenin atap ótti. Sonyń biri – AMANAT partıasy.

«Saıası partıalardyń sıezerinde AMANAT partıasynyń «Ádilet» partıasyna qosylýy týraly sheshim qabyldandy. Qazirgi ýaqytta qajetti uıymdastyrýshylyq jáne quqyqtyq is-sharalar júrgizilýde», – dedi Jaqselekova.

Onyń baıandamasyn qorytyndylaǵan OSK tóraǵasy Nurlan Ábdirov Ortalyq saılaý komısıasyna AMANAT partıasynan partıanyń aldaǵy Quryltaı saılaýyna qatyspaıtyny týraly resmı hat kelip túskenin habarlady.