Adam ómirinde ýaqyttyń ózi de toqtap qalǵandaı kórinetin erekshe sátter bolady. Sol sátterdiń biri – mekteppen qoshtasý kúni. Bul – qýanysh pen qımastyq qatar órilgen, júrekke san túrli sezim uıalatatyn erekshe mezet. Keshe ǵana mektep tabaldyryǵyn júreksine attaǵan kishkentaı búldirshinderdiń búginde qolyna atestat alyp, úlken ómirge jol tartýy – ýaqyttyń sheksiz júıriktigin taǵy bir dáleldeıdi.
Bala kúnimde mektep maǵan alyp álem bolyp kórinetin. Bıik dálizderi, syńǵyrlaǵan qońyraýy, partalarǵa sińgen bordyń ıisi, ustazdyń meıirimge toly janary, úzilistegi dostardyń shat kúlkisi – munyń bári meniń balalyq shaǵymnyń ajyramas bólshegine aınaldy. Sol kezde mektep qabyrǵasyndaǵy kúnderdiń qanshalyqty qymbat ekenin sezine qoımappyn. Búgin ǵana onyń árbir sáti júrektiń túkpirinde saqtalatyn eń asyl estelik ekenin uqtym.
Mektep – jaı ǵana bilim alatyn oryn emes. Ol – adam bolýdy úıretetin úlken ómir mektebi. Biz munda árip tanyp, esep shyǵarýdy ǵana emes, qýana bilýdi, jeńile bilýdi, dostyqty qadirleýdi, úlkenge qurmet kórsetýdi, kishige qamqor bolýdy úırendik. Keıde súrindik, keıde qatelestik, keıde jeńiske jettik. Biraq árbir qadamymyzdyń janynda bizge sengen ustazdarymyz turdy. Olar bilim berýmen ǵana shektelmeı, júregimizge meıirimniń, jaýapkershiliktiń, adamgershiliktiń dánin septi.
Ustaz... Bul sózdiń ózinde sheksiz qurmet jatyr. Sebebi ustaz – adamnyń ómir jolyna sáýle túsiretin shamshyraq. Keıde biz baıqamaıtyn eńbektiń, kózge kórinbeıtin janashyrlyqtyń artynda olardyń mańdaı teri turady. Bizdi árbir jetistikke jetelegen, súringende qanattandyrǵan, armandaýǵa úıretken de – sol kisiler. Búgingi jetistigimizdiń árbir kirpishi olardyń eńbegimen qalandy.
Men úshin bul kúnniń orny erekshe. Sebebi mektepti «Altyn belgimen» aıaqtaý baqyty buıyrdy. Bul ataq eshqashan jalǵyz adamnyń jeńisi emes dep oılaımyn. Onyń artynda ata-anamnyń uıqysyz túnderi, únsiz tilegen tilegi, ustazdarymnyń tabandy eńbegi, ózimniń tynymsyz izdenisim jatyr. Sondyqtan búgin qolyma atestat alǵan sátte, eń aldymen, meni osy kúnge jetkizgen jandarǵa degen alǵys sezimi júregimdi kernedi.
Uly aǵartýshy Ahmet Baıtursynuly: «Ustazdyq etken jalyqpas, úıretýden balaǵa» degen. Bul sózdiń mánin búgin burynǵydan da tereńirek túsingendeımin. Sebebi ustazdyń bergen bilimi ýaqyt ótken saıyn óz jemisin beredi.
Mekteppen qoshtasý – balalyq shaqpen qoshtasý degen sóz. Endi mektepke kún saıyn asyǵyp barmaımyz. Tańerteńgi qońyraýǵa keshigip qalamyz dep júgirmeımiz. Synyptaǵy óz ornymyz, kúnde júzdesetin dostarymyz, taqta aldynda jaýap bergen sátterimiz endi estelikke aınalady. Biraq adam mektepten ketse de, mektep eshqashan adamnyń júreginen ketpeıdi.
Qazaqtyń kórnekti jazýshysy Ǵabıt Músirepov: «Tárbıe – tal besikten bastalady» degen edi. Sol tárbıeniń úlken jalǵasyn biz mektepten aldyq. Osy qasıetti shańyraq bizge bilim ǵana emes, ómirdiń eń mańyzdy qundylyqtaryn syılady.
Búgin men ózimmen birge qanat qaqqan barsha túlekterge qarap otyryp, árqaısysynyń júreginde úlken arman jatqanyn sezemin. Birimiz aq halat kıip, adam janynyń arashashysy bolýdy armandaımyz. Birimiz eldiń erteńin tárbıeleıtin ustaz atanǵymyz keledi. Birimiz ǵylymǵa, birimiz ónerge, endi birimiz jýrnalısıkaǵa jol tartamyz. Armandarymyz ártúrli bolǵanymen, maqsatymyz bir – týǵan elimizdiń damýyna adal eńbekpen úles qosý.
Aldymyzda jańa ómir kútip tur. Onyń qandaı bolaryn eshkim dóp basyp aıta almaıdy. Biraq biz mektepten alǵan bilimimiz ben tárbıemizdi ómirlik serigimizge aınaldyra alsaq, kez kelgen asýdy baǵyndyramyz dep senemin. Óıtkeni bilim – adamdy bıikke kóteretin qanat, al eńbek – sol qanatty taldyrmaıtyn kúsh.
Qurmetti zamandastarym!
Búgin biz mekteptiń esigin jaýyp emes, jańa ómirdiń esigin ashyp baramyz. Endigi ár kúnimiz – óz qolymyzben jazylatyn taǵdyr kitabynyń jańa beti. Sol kitaptyń ár paraǵy adal eńbekpen, izgi ispen, elge degen súıispenshilikpen tolsyn. Qandaı bıikke shyqsaq ta, bizge alǵash qalam ustatyp, úlken ómirge baǵyt bergen altyn uıamyzdy eshqashan umytpaıyq.
Qosh bol, balalyqtyń mekeni bolǵan aıaýly mektebim!
Seniń ár kirpishiń, ár dáliziń, ár synybyń biz úshin saǵynyshqa aınalatynyn búgin ǵana anyq sezindim. Sen bizge tek bilim emes, ómirdiń mánin, armannyń qadirin, eńbektiń qasıetin úırettiń. Erteń árqaısymyz ár qıyrǵa qanat qaǵarmyz. Biraq qaıda júrsek te, júregimizdiń bir buryshynda seniń úniń – sońǵy qońyraýdyń syńǵyry máńgi jańǵyryp turady.
Óıtkeni mekteppen qoshtasý – ótkenmen qoshtasý emes. Ol – júrekke úmit uıalatyp, bolashaqqa senimmen bastaıtyn jańa ómirdiń alǵashqy qadamy.
Arýjan Nuraqyn
