Azamattardy turaqty jumys oryndaryna ornalastyrý boıynsha júrgiziletin is-sharalar nátıjeli bolýy qajet. Osy rette jergilikti atqarýshy organdar jumysty kúsheıtýi tıis.
Bul jóninde Prezıdent janyndaǵy Ortalyq komýnıkasıalar qyzmetinde «Jalpyǵa Ortaq Eńbek Qoǵamyn qalyptastyrý jáne jumyspen qamtý boıynsha QR DSÁDM-de atqarylyp jatqan jumystar» taqyryby talqy bolǵan BAQ ókilderimen ótken kezdesýde Densaýlyq saqtaý jáne áleýmettik damý vıse-mınıstri Birjan Nurymbetov málim etti. Onyń aıtýyna qaraǵanda, elimizde bıyl respýblıka boıynsha Eńbek kúnine arnalǵan 160-tan astam merekelik is-sharalar ótkizildi. Jáne de Elbasynyń tapsyrmasy boıynsha bes reformany júzege asyrýǵa baǵyttalǵan Ult jospary — «100 naqty qadam» aıasynda qolǵa alynyp otyrǵan birqatar mindetter atalyp ótildi. Osy oraıda 88-qadamdaǵy aqparattyq, tájirıbelik-uıymdastyrýshylyq sharalar kesheninen turatyn «Jalpyǵa Ortaq Eńbek Qoǵamy» ıdeıasyn alǵa jyljytýdyń keshendi jospary bekitilgeni belgili boldy.
Sondaı-aq, jastar arasynda kásiptik-tehnıkalyq jáne jumysshy mamandyqtarynyń mártebesin arttyrý men olardy nasıhattaý maqsatynda semınarlar, dóńgelek ústel jáne ártúrli aksıalar ótkizildi. Mereke qarsańynda 500-den astam adam qatysqan iri kásiporyndar men uıymdarda «Jalpyǵa Ortaq Eńbek Qoǵamyna qaraı!» uranymen flesh-mobtar uıymdastyrylsa, jekelegen aımaqtarda kóptegen baıqaýlar qolǵa alyndy.
Bul rette jumyspen qamtý sharalaryna qatysty jyl basynan beri aımaqtyq ákimder, jumys berýshiler, kásipodaqtar uıymy arasynda jumys oryndaryn saqtaý boıynsha 72 myńnan astam memorandýmǵa qol qoıdy. Jáne de aımaqtyq jumyspen qamtý keshendi josparynyń sheńberinde 311,6 myń adam jumysqa ornalastyrylsa, bul josparlanǵan kórsetkishtiń 102%-yn qurap otyr. Sonymen qatar, «Jumyspen qamtýdyń jol kartasy-2020» baǵdarlamasynyń aıasynda 118,3 myń adam, onyń ishinde 97,4 myńy turaqty jumys ornymen qamtyldy.
Jıyn barysynda osyndaı aqparattarmen bólisken vıse-mınıstrdiń sózin Kásipodaqtar federasıasy tóraǵasynyń orynbasary Qaırat Aıtýǵanov jalǵastyra kele, atalmysh baǵdarlamany eńbek adamynyń konstıtýsıasy retinde tanýǵa bolatynyn aıtty. Sondyqtan, biz – kásipodaqtar 2 mıllıonnan astam eńbekkerlerdiń múddesin qorǵaıtyn azamattyq qoǵamnyń bir bóligi retinde, osy Ult josparyn oryndaýǵa atsalysamyz, dedi ol óz sózinde.
Aıtar bolsaq, «Eńbek qatynastaryn yryqtandyrý. Jańa Eńbek Kodeksin ázirleý» atty 83-shi qadamdy júzege asyrýda elimizdegi Kásipodaqtar federasıasy Densaýlyq saqtaý jáne áleýmettik damý mınıstrligimen birlese otyryp, Eńbek kodeksiniń jańa jobasy boıynsha syndarly jumystar júrgizip, nátıjesinde múshe uıymdardan kelip túsken 200-den asa usynystyń zań jobasyna117-si engizilgendigin atap aıtty. Bul rette jumystyń oń nátıje bergendigi atalyp ótildi.
– Jańa Eńbek kodeksinde jumys berýshi men eńbekkerlerdiń arasyndaǵy qatynastardyń basym kópshiligi ujymdyq kelisimsharttar arqyly qurylatyn bolady. Olar negizgi zańdy qujat bolyp tabylady, basqasha aıtqanda, árbir ujymda bul qujat onyń «konstıtýsıasymen» teń bolýy tıis. Sondyqtan, áleýmettik qatynastardyń barlyq aspektilerin osy kelisimsharttarda barynsha bekitý kerek. Osyǵan baılanysty Kásipodaqtar federasıasy jańa Eńbek kodeksiniń erejelerin túsindirý maqsatyndaǵy kásipodaq aktıvin oqytý jáne tıptik ujymdyq kelisimsharttar boıynsha usynystar ázirleý jumystaryn júrgizýde, – dep atap ótti Q.Aıtýǵanov.
Derekkóz: egemen Qazaqstan
