Keshe Ortalyq komýnıkasıalar qyzmetinde Ulttyq ekonomıka vıse-mınıstri Qaıyrbek Óskenbaev baspasóz máslıhatyn ótkizdi. Ol aýyl sharýashylyǵy maqsatyndaǵy jerlerdi paıdalanýdyń erekshelikteri jóninde áńgimelep, osyǵan qatysty túzetýler engizilgen zań týraly aıtty.
Elimizdiń jer qorlaryn túgendep, qansha bóligi qandaı maqsatqa paıdalanylatynyn túgendep shyqqan vedomstvo basshysynyń orynbasary, aýyl sharýashylyǵynyń qajetin ótep kele jatqan jer qorlarynyń jalpy jaǵdaıyna toqtalyp ótti. Onyń sózin nazarǵa alar bolsaq, qazaqstandyqtardyń kópshiligi Jer-anamen durys jumys istemeı otyr. Jerdiń jaǵdaıyn oılap, jańa tehnologıa engizip jatqandar men paıdaly tyńaıtqyshtardy ýaqtyly paıdalanatyndardyń sany az. Osynyń saldarynan quıqaly jerlerdiń sapasy sońǵy 15-20 jylda kádimgideı nasharlaı bastaǵan. Muny oılap, erteńgi yryzdyǵynyń kúıine bas qatyrmaǵan sharýalardy tártipke shaqyrý maqsatynda Úkimet tıisti zańdy zamanǵa saı jetildirip, birqatar baptaryna túzetýler engizipti. Qazirgi tańda bul zańdy Májilis pen Senat maquldap ta qoıypty. Soǵan qaraǵanda, jańarǵan zań jerdi paıdalanatyn barlyq tarapqa da tıimdi bolǵany. Osyny jetkizgen vıse-mınıstr birneshe ózekti máseleniń betin ashty.
Máselen, Qazaqstanda paıdala­nyl­maǵan aýylsharýashylyq jerler kólemi 7,3 mln. gektardy quraıdy eken. «Qazaqstanda egistik jerlerdiń kólemi 24 mln. 268 myń gektar, tyńaıǵan jerler 2,5 mln. gektar, shabyndyqtar 2 mln. gektar, jaıylym jerler 66,2 mln. gektar. Memleket basshysynyń tapsyrmasy boıynsha 2012-2014 jyldar aralyǵynda ınventarızasıa ótti. Iaǵnı aýyl sharýashylyǵyna qaraıtyn jerler túgendelip shyqty. Onyń ishinde jerdiń sapasy qandaı, qansha sýbektiler paıdalanylmaı bosqa tur. Osynyń barlyǵy táptishteldi. Eń ókinishtisi, 15-20 jyldyń ishinde jerdiń sapasy tómendeı bas­tady. Elbasynyń jerlerdi qalpyna keltirý, jaqsartý týraly tapsyrmasy boıynsha Úkimet jumys istep jatyr. Atap aıtarlyǵy, 2007 jyldan bastap Aýyl sharýashylyǵy mınıstrliginiń júıeli jumysynyń arqasynda mıneraldy tyńaıtqyshtar engizilgen aýylsharýashylyq alqaptary jyl saıyn arta bastady. Biraq, áli kóńil tolatyndaı jaǵdaıǵa jete qoıǵan joqpyz. Osy máseleler Úkimettiń basty nazarynda tur», dedi Q.Óskenbaev.
Baspasóz máslıhaty barysynda vıse-mınıstr 2012-2014 jyldardaǵy túgendeý kezinde paıdalanylmaı jatqan aýylsharýashylyq jerleriniń kólemi anyqtalǵanyn da aıtty. Sóıtip, bul jaǵdaıda qaı oblystyń kósh bastap turǵanyn da jasyrmady. Sonymen, onyń kel­tirgen deregi boıynsha res­pýb­lı­ka­myzda paıdalanylmaı jatqan jerdiń kólemi 7,3 mln. gektardy quraǵan. Eń úlken alqap Qaraǵandy oblysynda tirkelgen, onyń aýmaǵy 1 mln. 800 myń gektarǵa teń. Sondaı-aq, Aqmola oblysynda 1 mln. 100 gektar, Shyǵys Qazaqstan oblysynda 985 myń gektar jer qajetke jaramaı bos tur. Bul rette jergilikti azamattar durys jumys istemeı jatyr dep aıtýǵa bolmaıdy. Ár oblysta ondaı jerler kezdesedi», dedi ol.
Buǵan qosa, aýyl sharýashylyǵy maqsatyndaǵy memlekettik bosalqy jerler naryqtyq aınalymǵa tartylmaǵan kúıde qalyp otyrǵan kórinedi. «Búgingi tańda aýyl sharýashylyǵy maqsatyndaǵy jerlerdiń 97,4 mln. gektary, ıaǵnı 98,8 paıyz uzaq merzimge jalǵa berilgen. Al jekemenshikke tıesili jer úlesi 1,2 paıyzdy ǵana quraıdy», degen vıse-mınıstr jýrnalısiń qoıǵan suraǵyna oraı, jańa zań boıynsha Qazaqstanda sheteldikterge jer satylmaıtynyn kesip aıtty. Esesine sheteldikter jańa, paıdaly tehnologıalar alyp kelse jer 25 jylǵa ǵana jalǵa beriletinin táptishtep jetkizdi. Onyń ózinde jalǵa berilgen jerlerdiń árkez muqıat baqylaýda bolatynyn nyqtap ótti.

Derekkóz: egemen Qazaqstan