قىزىلوردالىق پوليسەيلەر 1 تاۋلىك بويى ءىز-تۇسسىز جوعالىپ كەتكەن 3 جاسار ءسابيدى ىزدەپ تاپتى، - دەپ حابارلايدى «قامشى» پورتالى sn.kz-كە سىلتەسە جاساپ.

وقيعا 29 اقپان كۇنى ورىن العان. بالاسىن جوعالتقان اتا-انا ىشكى ىستەر دەپارتامەنتىنە كەشكى ساعات 20:30-دار شاماسىندا حابارلاسىپتى. مۇنان كەيىن جول-پاترۋلدىك پوليسيا قىزمەتكەرلەرى، ۋچاسكەلىك پوليسەيلەر جانە توتەنشە جاعدايلار دەپارتامەنتىنىڭ ماماندارى بىرلەسە ىزدەستىرۋ شارالارىن جۇرگىزگەن.

بىرنەشە ساعاتقا سوزىلعان ىزدەۋ شارالارى بارىسىندا سول اۋماقتاعى كوپ قاباتتى تۇرعىن ۇيلەردىڭ وجىرەلەرى، پودەزدەرى، اياقتالماعان قۇرىلىس نىساندارى، ساياجاي اۋماعىنداعى دالالىق ەلدىمەكەندەر تەكسەرىلىپ، كورگەن-بىلگەن ادامداردان جاۋاپتار الىندى. اتالعان فاكتىگە سەبەپ بولارلىق جايتتار، بارلىق بولجامدار جان-جاقتى قارالدى. ىزدەۋ شارالارىنىڭ ناتيجەسىندە، 3 جاستاعى ءبۇلدىرشىن تاسبوگەت كەنتى، پمك-19 ساياجايىنىڭ باتىس جاعىنان 4 شاقىرىم قاشىقتىقتاعى جىڭعىلدار اراسىندا ۇيىقتاپ جاتقان جەرىنەن تابىلعان.

سونداي-اق، ءدال وسى كۇنى 8 سىنىپتا وقيتىن ءجاسوسپىرىم قىزدىڭ جوعالىپ كەتۋ فاكتىسى دە تىركەلدى. ول كەشكى 21:30 شاماسىندا تاسبوگەت كەنتىندەگى اجەسىنىڭ ۇيىنە كەتىپ، دىتتەگەن جەرىنە بارماعان جانە ۇيىنە دە ورالماعان. قىزدىڭ اناسى پوليسەيلەرگە تۇنگى 01:30 شاماسىندا حابار بەرىپ، دەرەۋ ىزدەۋ شارالارى جۇرگىزىلدى.

ءتارتىپ ساقشىلارى جوعالعان جەتكىنشەكتىڭ قۇربى-قۇرداستارىنان تۇگەل سۇراستىرىپ، تۇسىنىكتەمەلەر العان. ناتيجەسىندە تاڭعا جاقىن وقۋشى قىز امان-ەسەن تابىلدى.

جوعالعان ەكى بالانىڭ دا جاعدايلارى جاقسى، دەنساۋلىقتارىنا ءتونىپ تۇرعان ءقاۋىپ جوق.