جازۋشى، قازاقى سالت-داستۇرلەردى ناسيحاتتاۋشى زەينەپ احمەتوۆا ەلدى كۇلدىرەمىن دەپ تالاي نارسەنى ءبۇلدىرىپ جۇرگەن ءارتءىس ەركەكتەردى قاتاڭ سىنعا الدى، - دەپ حابارلايدى «قامشى» پورتالى korrespondent.kz-كە سىلتەمە جاساپ.
«ايتا-ايتا شارشادىم، ءبىراق ءالى ايتىپ ءجۇرمىن. تەلەديداردى بۇراپ قالسام، جاڭاعى "شانشاردىڭ" كورىنىسى بولىپ جاتىر. ءبىر كەمپىر سويلەپ تۇر، ونىڭ ءوزى ەركەك. بايقايسىزدار ما، ءبىزدىڭ قازاقتىڭ جىگىتتەرى قاتىن بولۋعا اۋەس بولىپ الدى ءقازىر.
ىشتەرىندە بىردەڭە تۇرتكىلەپ تۇرادى. سولاردىڭ بار عوي ءبىر بالەسى بار. ايتپەسە دارداي ەر ازاماتتار نەمەنەگە سونشا ايەل بولۋعا تىرىسادى؟ باسىنا ورامال سالىپ، ۇستىنە كويلەك كيىپ. ويباي-اۋ، سوندا ايەلدىڭ ءرولىن وينايتىن قىز-كەلىنشەكتەر قۇرىپ قالدى ما؟ تولىپ جاتىر. ءبىراق تا ۇپ-ۇلكەن ەر ازاماتتار ايەل بولۋعا قۇمار بولادى دا تۇرادى. ىربىڭدايدى دا تۇرادى، ىربىڭدايدى دا تۇرادى. سونى كەرەمەت كەلىستىرىپ تە جاتقان جوق» دەپ اشىندى باۋىرجان مومىش ۇلىنىڭ كەلىنى ز.احمەتوۆا. سونداي-اق، قازاق سالت-داستۇرلەرىنىڭ جاناشىرى الگى تەاتر كورىنىسى اشۋىنا تيگەنىن جەتكىزدى. ايتۋىنشا، قويىلىمدا ءۇش كەلىن قايىن اتاسىمەن بىرگە ساحناعا شاپقىلاپ شىعىپ، ونىڭ ءبىرى ۇلكەن كىسىنى موينىنا مىنگىزىپ العان. سويتسە ءۇش كەلىن قايىن اتالارىنىڭ تۋعان كۇنىنە سونداي توسىن سىي جاساۋعا بەل بۋعانعا ۇقسايدى.
«قاراڭىزدارشى، و زاماندا بۇ زامان، كەلىننىڭ موينىنا مىنگەن قازاقتىڭ شالىن كوردىڭىزدەر مە؟ ءتىپتى وقىماعان سۇمىراي شالدى كوردىڭىزدەر مە؟ جوق، سۇمىراي شالدىڭ ءوزى وتىرمايدى ءولىپ كەتسە دە كەلىننىڭ موينىنا. قازاقتىڭ كەلىنى قايىن اتانىڭ كەبىسىنە اياق سۇقپاعان. ەنەنىڭ توسەگىنە وتىرماعان، ۇلكەننىڭ الدىن كەسىپ وتپەگەن.... سونى كورگەن كىشكەنتاي قىزدار قالاي قابىلدايدى؟» - دەدى ز.احمەتوۆا.
«دۇنيەنىڭ ءبارىن بىلەتىن شانشاردىڭ ديرەكتورى ۋاليبەك سوعان كەلگەندە نەگە بىلمەي قالدى؟ نەمەسە اناۋ ءجۇسىپ. اتا ساقالى اۋزىنا تۇسكەن، نەمەرە ءسۇيىپ وتىرعان جىگىت. سول ايتپاي ما؟ «ە، مىناۋىمىز ۇيات بولادى. مىناۋ ءبىزدىڭ سالتىمىزعا تومپاق نارسە. مىناۋ قازاققا قيانات، بۇلاي بولمايدى. باسقاشا كۇلدىرەيىك، مەيلى يت بولىپ ۇرەيىك، شوشقا بولىپ قورسىلدايىق. ءبىراق، مىنانى ىستەمەيىك» دەپ ايتۋعا بولادى عوي. نامىس جوق بىزدە. نامىس بولماي بارا جاتىر بىزدە» - دەپ ويىن تۇيىندەدى جازۋشى.
پىكىر قالدىرۋ