الماتى تۇرعىندارىنىڭ سانى كۇن سايىن 100 ادامعا تولىعادى. قالاداعى پەرزەنتحانالاردا تاۋلىگىنە ورتا ەسەپپەن وسىنشا ءسابي دۇنيە ەسىگىن اشادى ەكەن. ال، قالالىق ەمحانالار كۇن سايىن 140 مىڭ ادامدى، - دەپ حابارلايدى «قامشى» پورتالى «الماتى» تەلەارناسىنا سىلتەمە جاساپ.

بيىل قالادا ءبىرقاتار دەنساۋلىق ساقتاۋ مەكەمەسى پايدالانۋعا بەرىلدى. ولار تۇركسىب، ناۋرىزباي جانە الاتاۋ اۋداندارىندا ورىن تەپكەن. وعان قوسا، №6 جانە №11 قالالىق ەمحانالاردىڭ قوسىمشا عيماراتتارى جۋىردا اشىلاتىن بولادى. سونىمەن قاتار، قالالىق كلينيكالىق جۇقپالى اۋرۋلار اۋرۋحاناسىنىڭ زەرتحانالىق كورپۋسىنىڭ قۇرىلىسى اياقتالۋدا.

"اشىلاتىن مەديسينالىق نىسانداردى قابىلداۋعا ءماسليحات دەپۋتاتتارىن تارتۋدى كوزدەپ وتىرمىز. قالقامان ىقشام اۋدانىندا 200 ادامعا شاقتالعان ەمحانانانىڭ قۇرىلىسى جۇرگىزىلۋدە. سونداي-اق وسى جىلدىڭ تامىز ايىندا №14 ەمحانانى قولدانىسقا بەرۋدى جوسپارلاپ وتىرمىز"،- دەدى الماتى قالاسى دەنساۋلىق ساقتاۋ باسقارماسىنىڭ باسشىسى ءۋاليحان احمەتوۆ.

الماتىدا جازاتايىم وقيعالار مەن جاراقات جانە ۋلانۋدان بولاتىن ءولىم سانى سالىستىرمالى تۇردە 2،4 پايىزعا تومەندەگەن. وتكەن جىلى 973 مىڭنان اسا ادام سكرينينگتىك تەكسەرۋدەن ءوتىپ، 95 مىڭى ناۋقاس ەكەنى انىقتالعان. تۋبەركۋلەزدەن ءولىم كورسەتكىشى 3 ەسەگە قىسقارىپتى. ال، بۇل اۋرۋمەن سىرقاتتانۋ كورسەتكىشى 35 پايىزعا تومەندەپ، رەسپۋبليكا بويىنشا جوعارى ناتيجە كورسەتكەن. قۋانىشتى جاڭالىق، وتكەن جىلى قالادا انا مەن بالا ءولىمىنىڭ كورسەتكىشى كەمىپتى.

"مەنىڭ ويىمشا، ەلىمىزدەگى ازاماتتاردىڭ باسىم بولىگى الماتىدا ەمدەلەدى. اسىرەسە، پاتولوگياسى بار ناۋقاستار دەرتىنە شيپا الۋ ءۇشىن قالالىق دارىگەرلەرگە جۇگىنەدى. الماتى دونور بولعاندىقتان، باسقا وڭىرلەرگە قاراعاندا وعان جوعارى جەتىستىكتەردى كورسەتۋ قيىنعا سوعادى"،- دەدى ق ر دەنساۋلىق ساقتاۋ جانە الەۋمەتتىك دامۋ مينيسترلىگى كوميتەتىنىڭ ءتوراعاسى ءامىر احەتوۆ.

كۇن سايىن الماتىداعى ەمحانالارعا 140 مىڭنان استام تۇرعىن كومەككە جۇگىنەدى. سونىڭ ىشىندە 60 مىڭنان استام ازاماتقا زەرتحانالىق، 15 مىڭنان استامىنا دياگنوستيكالىق زەرتتەۋ جۇرگىزىلەدى. سونداي-اق ەكى مىڭعا جۋىق ناۋقاس كۇندىزگى ستاسيوناردا ەم قابىلدايدى. ولارعا 30 مىڭنان استام دارىگەر قىزمەت كورسەتەدى.