«دامۋ ءۇشىن اۋەلى بەيبىتشىلىك كەرەك. ءوزارا كەلىسىم مەن حالىقتاردىڭ بىرلىگى كەرەك. تاۋەلسىزدىك جىلدارىندا ءبىزدىڭ اۋىزبىرلىگىمىز وسى قاعيداتتارعا سۇيەنىپ، ورنىقتى. بۇكىل الەم ءبىزدى وسى ءۇشىن قۇرمەتتەيدى. قازاقستان حالقى اسسامبلەياسىنىڭ تاجىريبەسىنە قىزىعۋشىلىق تانىتىپ وتىرعاندار كوپ. ءبىزدىڭ بۇگىنگى بىرلىگىمىزگە قالاي قول جەتكىزگەنىمىزدى بىلگىسى كەلەتىندەر جەتەرلىك. ەڭ الدىمەن، ءبارىمىز دە ادامبىز. ادامنىڭ قادىر-قاسيەتى ءبىرىنشى ورىندا تۇرۋى ءتيىس. ادامدار ءبىرىن-بىرى قادىرلەۋى كەرەك. كۇللى الەمدى ۇستاپ تۇرعان ىزگىلىك وسى»،- دەدى مەملەكەت باسشىسى نۇرسۇلتان نازاربايەۆ گااگاداعى 3ء-شى جاھاندىق قاۋىپسىزدىك ءسامميتىنىڭ قورىتىندىلارى بويىنشا وتكىزگەن بريفينگتە. قازاقستان حالقىنىڭ تاتۋلىعىنىڭ تالبەسىگى مەن تۇراقتىلىعىنىڭ تۇتقاسىنا بولعان قازاقستان حالىق اسسامبلەياسىنىڭ (قحا) قۇرىلعانىنا بيىل 19 جىل تولادى. 19 جىلدا اسسامبلەيا قوعامدىق بىرلەستىكتەن جالپىازاماتتىق ينستيتۋتقا اينالدى. بۇل ينستيتۋت مەملەكەتكە ساياسي، ەكونوميكالىق جانە الەۋمەتتىك رەفورمالاردى ءساتتى جۇرگىزۋگە جاردەمدەستى. سونىڭ ارقاسىندا، ەلىمىز دامۋدىڭ داڭعىل جولىنا ءتۇستى. بۇل جەردە ەشكىم دە قازاقستان حالقى اسسامبلەياسىنىڭ ءرولى مەن ماڭىزىن جوققا شىعارا المايدى. كەرىسىنشە، بۇل قۇرىلىم قوعامداعى تۇراقتىلىق پەن كەلىسىمنىڭ ىرگەتاسىن نىعايتتى. ەلباسىمىزدىڭ ءوزى ايتقانداي، «اسسامبلەيانىڭ تاريحى – ەل تاريحى، حالىق تاريحى». اتاپ ايتارلىعى، تاۋەلسىزدىك جىلدارىندا ەلىمىزدىڭ توزىمدىلىك پەن قوعامدىق كەلىسىم مودەلى ءبىزدىڭ شەتەلدەردەگى برەندىمىزگە اينالدى. سونىڭ ايعاعى شىعار، ءقازىر كۇللى الەم قازاقستاندى كەلىسىمنىڭ، ءوزارا ديالوگتىڭ جانە مادەنيەتتەر مەن دىندەر تاتۋلىعىنىڭ مەكەنى دەپ سانايدى. ءبىزدىڭ بىرەگەي وزىق تاجىريبەمىزدى دۇنيە ءجۇزى مويىنداپ وتىر. وتاندىق تەلەارنالاردىڭ بىرىنە بەرگەن سۇحباتىندا ەۋروپالىق وداقتىڭ ورتالىق ازيا بويىنشا ارنايى وكىلى پاتريسيا فلور بىلاي دەپتى: «تولەرانتتىلىق پەن سەنىم-نانىم بوستاندىعى، ەلدىڭ ءارتۇرلى الەۋمەتتىك توپتارىنداعى جاعىمدى ۇلتارالىق قارىم-قاتىناستار – بۇلاردىڭ ءبارى وسى مەملەكەتتىڭ ەرتەڭى ءۇشىن بوي كوتەرەتىن بەيبىتشىلىك پەن تۇراقتىلىق مەكەنىنىڭ كىشكەنتاي كىرپىشتەرى. ال، قازاقستان پرەزيدەنتى نۇرسۇلتان نازاربايەۆتىڭ، كۇللى قازاقستاندىقتاردىڭ بۇل ماسەلەگە ەرەكشە ءمان بەرۋىنىڭ ءوزى الەمدە جوعارى باعالانادى. سەبەبى، تابىستى مۋلتيمادەني ساياسات جانە قازاقستان حالىق اسسامبلەياسى سەكىلدى بىرەگەي بىرىكتىرگىش ورگان ءقازىر ءارتۇرلى مادەنيەتتەر مەن دىندەردىڭ ومىرىندەگى امبەتاپ ەۋرازيالىق مودەلگە اينالىپ كەتتى». جاھاندىق كونفەسسياارالىق ديالوگتىڭ قازاقستاندىق تاجىريبەسىن حالىقارالىق ۇيىمدار مەن شەتەلدىك ساراپشىلار ءبىرازدان بەرى زەرتتەپ كەلەدى. بۇل ورايدا، ەۋروپالىق ساراپشىلار كوپۇلتتى، كوپكونفەسسيالى قازاقستانداعى ۇلتارالىق كەلىسىمدى، الۋان ءتۇرلى مادەنيەتتەر مەن دىندەردىڭ ءوزارا ءۇنقاتىسۋىن بەيبىت ءومىر ءسۇرۋدىڭ جاھاندىق ەتالونى ەكەنىن ءادىل باعالادى. – مەنىڭ ويىمشا، بۇل ەلدىڭ يادرولىق قارۋدان باس تارتىپ قانا قويماي، كۇللى الەمدى بەيبىتشىلىككە شاقىرعان باستاماسى، ءدىني كوپتۇرلىلىگى مەن قوعامىنىڭ اشىقتىعى ۇلتتى بىرىكتىرىپ كەلەدى. قازاقستان پرەزيدەنتى ن. نازاربايەۆتىڭ جۇرگىزىپ وتىرعان ساياساتىنىڭ كورەگەندىلىگى مەن جەتىستىگى وسىندا،- دەيدى ورتالىق ازيا ايماعى بويىنشا تانىمال ساراپشىلاردىڭ ءبىرى ميحاەل لاۋبش. بۇگىنگى مىڭ قۇبىلعان ساياساتتىڭ ءوزى قازاقستاننىڭ دامۋدىڭ دۇرىس جولىن تاڭداعانىن كورسەتىپ وتىر. گااگاداعى 3ء-ىش جاھاندىق قاۋىپسىزدىك سامميتىندە ەلباسى وسى ايعاقتى تاعى ءبىر راستادى. – قازاقستاننىڭ سىرتقى ساياساتى تاتۋلىق پەن كوپۆەكتورلىققا، ال ىشكى ساياساتىمىز ءاربىر ازاماتتىڭ ءتىلى، ءدىنى جانە مادەنيەتىنە قاراماستان تەڭدىگى مەن قۇقىقتارىن ساقتاۋعا نەگىزدەلگەن. بۇل – بۇگىنگى زاماندا تۇراقتىلىق پەن تىنىشتىقتى قامتاماسىز ەتەتىن نەگىزگى فاكتور. مەملەكەت تەك وسىنداي قۇندىلىقتاردىڭ ارقاسىندا عانا قارقىندى دامي الادى. ەندەشە، بۇگىنگى تاڭداۋىمىز ءبىزدىڭ ەلىمىزدەگى ساياساتتىڭ دۇرىستىعىن دالەلدەۋدە،- دەدى نۇرسۇلتان نازاربايەۆ.