جاس انشىلەردەن قۇرالعان Ninety One توبى بۇگىندە ەل اۋزىنداعى نەگىزگى تاقىرىپتاردىڭ ءبىرى. اتالعان توپتىڭ ءسان ۇلگىسى مەن ساحناداعى ونەرىنە نارازى ازاماتتار ەلدىڭ ءار تۇكپىرىنەن شىعىپ جاتىر. Ninety One-نىڭ ەرتەڭ جەزقازعان قالاسىندا ءوتۋى ءتيىس كونسەرتىنە دە رۇقسات بەرىلمەپتى، - دەپ حابارلايدى Qamshy.kz.

19 قازان كۇنى جەزقازعان قالاسىنىڭ مادەنيەت جانە حالىقتار دوستىعى ۇيىندە Ninety One توبىنىڭ كونسەرتى ءوتۋى كەرەك بولعان. الايدا، قالا اكىمدىگىنە تۇرعىندار اتىنان اتالعان كونسەرتتىڭ وتۋىنە تىيىم سالۋ تۋرالى 350 ادام قول قويعان حات جولدانعان. حات اۆتورلارى توپتىڭ ۇستانىمدارى بالا تاربيەسىنە كەرى اسەرىن تيگىزەتىنىن ايتقان.  

اكىمدىك تۇرعىنداردىڭ ءوتىنىشىن قاناعاتتاندىرىپ، توپ كونسەرتىن وتكىزۋگە رۇقسات بەرمەگەن.

«حالىق قارسى بولىپ، جۇزدەن اسا ادام حات جولدادى. قالا تۇرعىندارىنىڭ وتىنىشىمەن ساناسىپ، اتالعان توپتىڭ ەرتەڭگى كونسەرتىن وتكىزۋگە رۇقسات بەرىلمەدى»، - دەيدى جەزقازعان قالاسى اكىمىنىڭ باسپا ءسوز حاتشىسى گۇلدەن جانديلدينوۆا.

اكىمدىك وكىلى كونسەرتكە الدىن-الا بيلەت العان تۇرعىنداردىڭ اقشالارى قايتارىلىپ جاتقانىن دا جەتكىزدى. 

ەستەرىڭىزگە سالساق، بۇعان دەيىن Ninety One توبىنا قارسى شىمكەنت، اقتوبە، قاراعاندى قالالارىندا دا نارازىلىق شارالارى وتكەن بولاتىن.