اسا اۋقاتتى وتباسىندا بالا كۇتىمىمەن، ءۇي شارۋاسىمەن جانە وتاعاسىنىڭ قارت اكە-شەشەسىن باعىپ-قاعۋمەن بەس جىل اينالىسقان ا. ەسىمدى قىز كورگەندەرىمەن ءبولىستى، - دەپ حابارلايدى Qamshy.kz.  

«مەن قىزمەت ىستەگەن بايدىڭ ايەلى اۋىلداسىم بولعاندىقتان وعان اپكە رەتىندە قارادىم.  ءبىراق سول «اپكەم» بەس جىل ىشىندە ماعان ەشقانداي اقى تولەمەي، تەگىن قىزمەت جاساتتى. ءوزى اپتا سايىن شەت ەلدىڭ كۋرورتتتارىندا دەمالادى. قىمبات اۆتوكولىكتى اي سايىن اۋىستىرادى دەسەم، مۇمكىن سەنبەيتىن بولارسىز. ءبىراق بۇل بۇكپەسىز شىنىم، جەزدەمنىڭ قارت اكە-شەشەسى اۋرۋ، سولاردى كۇتەمىن. بالالاردىڭ كىر-قوڭى، تاماعى ءبارى مەنىڭ موينىمدا. اۋىلدان شىققان جاقىنىم عوي دەپ، زىر جۇگىرىپ قىزمەت ەتتىم. بەس جىل ىشىندە «اتا-اناڭا بارىپ كەلشى» دەپ، ەڭ بولماسا 500 تەڭگە بەرگەن ەمەس.

بۇل وتباسىنىڭ ساراڭدىعىن سوزبەن سۋرەتتەپ تاۋىسۋ مۇمكىن ەمەس. ۇيلەرىنە ەشكىمدى جولاتپايدى. ءبىر ۇيدە بىر-ەكى جىل عانا تۇرادى. ءىرى قالالاردان قىمبات پاتەرلەر الىپ، ۇنەمى كوشىپ-قونىپ جۇرەدى. مەن ىشكەن تاماعىم بولماسا بۇل ۇيدەن ەشقانداي پايدا كورمەدىم.   

جەزدەم وتە دورەكى، ءبارىن بالاعاتتاپ سويلەيدى. كوبىنەسە شەت ەلدە جۇرەدى. ۇيگە كەلگەندە ءبارىمىزدى بالاعاتتاپ، جەردەن الىپ جەرگە سالادى.  ۇيدەگى ەكى بالاسىنىڭ بار شارۋاسى مەنىڭ موينىمدا. دايىن تاماقتى كۇتىپ وتىرادى. كىسىلىگى جوق. بىردە ەرلى-زايىپتى ەكەۋى ءبىر جۇمىستارمەن سىرتقا كەتكەن. ماعان بازاردان ازىق-تۇلىك اكەپ قوي دەپ تاپسىردى. جاسى جيىرماعا كەلگەن ۇلىنا «ماشينامەن بازارعا بارىپ كەلەيىك» دەپ ەدىم، موينى جار بەرمەدى. ءوزىم بارۋىما تۋرا كەلدى. زىلدەي جۇكتى بەلىمدى مايىستىرىپ كوتەرىپ جاياۋ كەلدىم. زىڭگىتتەي جىگىت بوپ قالعان بالاسىنىڭ تىپتەن جانى اشىعان جوق.

اپكەم دۇكەنگە، بازارعا جىبەرگەندە چەك تالاپ ەتەدى. مىندەتتى تۇردە تيىن-تيىنىنا دەيىن ەسەپتەپ الادى. اۆتوبۋس، تاكسيگە قانشا جۇمساعانىما دەيىن تەرگەپ تۇرىپ سۇرايدى. ال ءوزى قارا باسى ءۇشىن مىڭداعان دوللاردى اياماي جۇمسايدى. بالالارىنىڭ  تۋعان كۇنىن دە تەك وزدەرى وتىرىپ جاسايدى.  ەشكىمدى شاقىرمايدى.   

بىردە اۋىلداعى اتا-انامدى ساعىنىپ، بارىپ قايتۋعا رۇقسات سۇرادىم. ونىڭ ۇستىنە سول كۇنى باسىم اۋىرىپ، قينالدىم. اپكەم 100 تەڭگە دە بەرگەن جوق. كوك تيىنسىز كوشەگە قالاي شىعامىن. اۋىلعا بارماعان كۇيى قالا بەردىم.

ءوزىڭدى ادام قۇرلى كورمەيتىن ۇيگە نەگە قىزمەت ەتەسىڭ دەيسىز عوي؟ جەزدەمىز بەدەلدى ادام، ەڭ بولماسا قالاداعى ءبىر كوللەدجگە بولسا دا وقىتا ما دەپ ۇمىتتەنىپ جىبەرىپ ەدى، اتا-انام. اپكەم ارقىلى كوللەدجدە وقىعىم كەلەتىنىن ءبىلدىرىپ ەدىم، بۇرقان-تالقان اشۋلاندى.

بۇل وتباسىنىڭ ادامدارى وزدەرىنەن باسقا ءتىرى جان جوقتاي ءومىر كەشەدى. جەزدەمىز قالاسا ىشكيىممەن وتىرا بەرەدى داستارحان باسىندا. باسقالاردان ۇيات-اۋ دەگەندى بىلمەيدى. وزدەرىنە قاجەت دەگەن باستىقتى عانا قوناققا شاقىرادى. ونداي دوكەيلەردىڭ الدىندا قۇرداي جورعالايدى.    

بەس جىل بويى بىرەۋدىڭ وتىمەن كىرىپ، كۇلىمەن شىعۋ وڭاي ما، دەنساۋلىعىم سىر بەردى. سودان ءوزىم جەكە قالعاندا بالا باعۋشى ىزدەگەن جارنامالاردى قاراپ وتىرىپ، ءبىر جاسار ءسابيى بار جالعىزباستى ايەلدى تاپتىم. بەس جىل بۇرىن اۋىلدان كيىپ كەلگەن جالعىز پالتومدى، ۇساق-تۇيەك كيىمدەرىمدى  الىپ، جاڭا تانىسقان ايەلدىڭ ۇيىنە كەتىپ قالدىم.

بۇل ايەل مەنىڭ اۋىلداسىم سياقتى اسا باي بولماسا دا ادامگەرشىلىگى بار. اي سايىن اقى تولەيدى. بالاسى دا مازاسىز ەمەس. ءقازىر كوللەدجگە ءتۇسۋ ءۇشىن اقشا جيناپ ءجۇرمىن. ءيا، ەشكىمنىڭ كۇنىن ەشكىمگە قاراتپاسىن» دەپ ءسوزىن اياقتادى ا.

جازىپ العان: ايعانىم ءبىرتۋار