2016 جىلعى 17 قازاندا ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ استانا قالاسىنىڭ اكىمدىگى «رۋحاني كەلىسىم كونگرەسى» حالىقارالىق قورىمەن بىرلەسىپ ۇيىمداستىرعان «ەتنيكاارالىق كەلىسىم – ءدىني تۇراقتىلىقتىڭ نەگىزى» تاقىرىبىنا ارنالعان حالىقارالىق كونفەرەنسيا جۇمىسىنا قاتىستى، - دەپ حابارلايدى Qamshy.kz.

كونفەرەنسيا رۋحاني كەلىسىم كۇنى جانە قازاقستان رەسپۋبليكاسى تاۋەلسىزدىگىنىڭ 25-جىلدىعىنا ورايلاستىرىلدى.

ن.ەرمەكبايەۆ ءوزىنىڭ قۇتتىقتاۋ سوزىندە حالىقارالىق كەڭىستىكتە، سونداي-اق مەملەكەت ىشىندە، مادەنيەتتەر مەن دىندەر اراسىندا سۇحبات ورناتۋعا، ۇيلەسىمدى ەتنيكاارالىق جانە كونفەسسياارالىق قاتىناستاردى دامىتۋعا باعىتتالعان مەملەكەت باسشىسىنىڭ ءبىرىنشى حالىقارالىق باستامالارىنىڭ ءبىرىنىڭ دۇنيەگە كەلگەن كۇنى رەتىندە ەلىمىزدىڭ تاريحىنا كىرەتىنىن ەسكەرە وتىرىپ، كونفەرەنسيا قاتىسۋشىلارىن كەلە جاتقان قازاقستان حالقىنىڭ رۋحاني كەلىسىم كۇنىمەن قۇتتىقتادى.

«قازاقستان زايىرلى مەملەكەتتىڭ نەگىزگى ءپرينسيپى رەتىندە – ءدىني، ۇلتتىق جانە ناسىلدىك قاتىستىلىعىنا قاراماستان بارلىق ازاماتتاردىڭ تەڭدىگىن جاريالادى. ەشكىم باسقا ازاماتتى ونىڭ ۇلتتىق، ءدىني قاتىستىلىعىنا نەمەسە ءدىني سەنىمىنەن باستارتۋى نەگىزىندە كىنالاۋعا قۇقىعى جوق. وسىنىڭ ارقاسىندا قازاقستاندا ەتنوستار مەن كونفەسسيالار اراسىندا دوستىق قاتىناستار ورنادى، ءارتۇرلى مادەنيەت ادامدارى اراسىندا سەنىم مەن كەلىسىم، بىر-بىرىنە دەگەن سىيلاستىق ءارقاشاندا ءبىزدىڭ قوعامىمىزدىڭ ماڭىزدى قۇندىلىقتارىمىز بولىپ تابىلادى»، - دەدى ەرمەكبايەۆ.

كونفەرەنسيا جۇمىسىنا قازاقستان حالىق اسسامبلەياسىنىڭ ءتوراعاسى ە.توعجانوۆ، استانا قالاسى اكىمىنىڭ ورىنباسارى ە.امانشايەۆ، «رۋحاني كەلىسىم كونگرەسى» حالىقارالىق قورىنىڭ ءتوراعاسى ت.مۇحامەدجانوۆ، رف مەملەكەتتىك دۋماسىنىڭ دەپۋتاتى ي.كوبزون، سونىمەن قاتار ءدىني بىرلەستىكتەردىڭ، عىلىمي-ساراپشىلار قاۋىمداستىعىنىڭ، رەسەي، قىرعىزستان، ليۆان جانە اقش مەملەكەتتەرىنىڭ ۇكىمەتتىك ەمەس ۇيىمدارىنىڭ وكىلدەرى قاتىستى.