جىلايمىز با، كۇلەمىز بە؟! «قىزعا قىرىق ۇيدەن تىيۋ» دەپ اتام قازاق بەكەر ايتپاسا كەرەك. قازىرگى زاماندا قىز تاربيەلەۋدىڭ ءوزى ۇلكەن ۋايىمعا اينالدى. ۇلكەنگە قۇرمەتتى، كىشىگە ىزەتتى ۇمىتقان بۇگىنگى قوعامدا كەي قىزدارىمىزدىڭ قىلىعى جاعا ۇستاتاتىن دەڭگەيگە جەتتى. ەكى كۇننىڭ بىرىندە دارەتحانادان بالا تاۋىپ، باۋىرىمىز ەزىلىپ ەدى. ەندى، مىنە، 22 جاستاعى مەرۋەرتتىڭ «باي دەمەۋشى ىزدەيمىن» دەگەن اشىق حاتى جىعىلعانعا جۇدىرىقتاي ءتيىپ وتىر. وزەكتى ورتەيتىنى، جازىپ وتىرعان ءوزىمىزدىڭ قارا كوز قازاق قىزىمىز، دەپ حابارلايدى Qamshy.kz Baq.kz سايتىنا سىلتەمە جاساپ.

«اتىڭ شىقپاسا، جەر ورتەنىڭ» كەرى مە، كىم ءبىلسىن... كەشە مەرۋەرت ەسىمدى قىز الەۋمەتتىك جەلىدەگى جەكە پاراقشاسىنا قىمبات كيىم كيىپ، جەكە پاتەردە تۇرىپ، جوعارى دەڭگەيدە ءومىر سۇرگىسى كەلەتىنىن، ال وسى ماقساتقا جەتۋ ءۇشىن «باي دەمەۋشى» ىزدەيتىنىن ەش بوياماسىز جازىپ قويعان.

مەرۋەرتتىڭ تالابى بويىنشا، «دەمەۋشىسى» جاسى 35-تەن اسپاعان، بويى 180-نەن جوعارى تەك قازاق بولۋى كەرەك. سونداي-اق، ءبىلىمدى، اقىلدى، قىزىقتى، جومارت ءارى ادامگەرشىلىگى زور بولۋى شارت.

ءوزى، جازباسىنا قاراعاندا، الماتىلىق، الماتى قالاسىندا تۇرادى. تاربيەلى وتباسىدان شىققان. جاسى 22-دە. ءتىپتى، ۋنيۆەرسيتەتتى «قىزىل ديپلوممەن» اياقتاپتى. ءبىراق، ازىرگە، جۇمىسسىز ەكەن.

«شىنىمدى ايتسام، جۇمىس ىستەگىم دە كەلمەيدى، سەبەبى قولىمنان تۇك كەلمەيدى. ءبىراق وتە قىزىقتى ءارى سۇلۋ قىزبىن. بويىم 168، سالماعىم 52 كگ. مودەلگە ۇقسايمىن»، - دەپ جازعان دەمەۋشى ىزدەگەن ارۋ.

مەرۋەرتتىڭ بولاشاق دەمەۋشىگە قويار تالابى: الماتىنىڭ ەليتتى اۋدانىندا ورنالاسقان ەۆروجوندەۋ جۇرگىزىلگەن جەكە پاتەردە تۇرعىسى كەلەدى. ءبىر ايعى شاي-پايىنا 1 ملن تەڭگە جەتەدى دەپ وتىر. ادەمى نومەرىمەن ايفون 7 تەلەفونى بولعانىن قالايدى. ازىرگە كولىك ايداي المايدى، سوندىقتان تاكسيمەن ءجۇرىپ-تۇرماقشى.

نە نارسەنىڭ تەك قىمباتى مەن ساپالىسىن قالايتىن سىلقىم ومىردەن بار جاقسىنى مولىنان العىسى كەلەدى ەكەن.

«قاراپايىم جىگىتتەر ماعان ءتيىستى دەڭگەيدە قامقور بولا المايتىنىن جاقسى تۇسىنەمىن) بار قالاۋىم، جوعارى دەڭگەيدە ءومىر ءسۇرۋ. بۇل قىلمىس ەمەس، مەنىڭ جەكە قالاۋىم»، - دەپ اقتالماق بولدى ارۋ.

«P.S. ناقتى ۇسىنىستارمەن جەكەگە جازىڭىزدار. ەگەر قالاۋىمداعى ەر ازامات تابىلسا، مەن ونىمەن كەزدەسۋگە دايىن ەكەنىمە ۋادە بەرەمىن. كەيىن بىرگە سۋرەتكە ءتۇسىپ، ونى جەكە پاراقشاما جاريالايتىن بولام. بارشاڭىزعا رازمەت!)»، - دەپ اياقتاعان ءوز جازباسىن ول.

وسىلايشا، جەكە ءومىرىن رەاليتي-شوۋعا اينالدىرعان مەرۋەرت، ەگەر باسى بوس بولسا، بولاشاق دەمەۋشىسىمەن وتاۋ قۇرۋعا دا دامەلى.

قىز قىلىعىنىڭ اق-قاراسىن وقىعان جۇرت ءوزى اجىراتا جاتار. قورقاتىنىمىز، مەرۋەرتتىڭ مۇنىسى ۆيرتۋالدىق ۆيرۋسقا اينالىپ كەتپەسە يگى.

ءبىر وكىنىشتىسى، مەرۋەرت سىندى قىزدار ەلىمىزدە از ەمەس. ال بىزدىكى، جالقاۋ قىزعا جارناما جاساۋ ەمەس، كەز كەلگەن اتا-انا قىزدارىنىڭ تاربيەسىنە تەرەڭ ءمان بەرىپ، ۇلت ۇرپاعىنىڭ جالعاستىرۋشىسى ەكەنىن ەستەن شىعارماسا ەكەن دەگەن تىلەك قانا.